‘GKK nga Mahalaron sa parokya mapasalamaton’

MATI CITY — Hiniusang pagpasalamat sa mga Gagmayng Kristohanong Katilingban (GKKs) sa distrito uno sa parokya-catedral ni San Nicolas de Tolentino ang nahitabo di palang dugay. Kini ang gihimo ni Apostolic Administrator /Parish Priest Msgr. Edito S. Baño, DCM, sa iyang pagdumala sa kasaulogan sa Santos nga Misa sulod sa kapilya sa GKK Hesus Nazareno, dalang Nazareno, siyudad sa Mati. Gipahinumduman niya ang kinatibuk-ang sakop sa distrito uno sa ilang makanunayong pagpadayon sa pagsangyaw sa gugma sa Diyos pinasikad sa tema nga ”Ang GKK nga Mahalaron sa Parokya Mapasalamaton.” Matud sa pari, ang ilang pagsangyaw maoy bunga sa pag-inambitay diha sa liturhikanhong kasaulogan aron makab-ot ang tumong sa kahiusahan sa parokya nga maoy sentro sa mga buhat sa pagtuman sa nagkadaiyang Kristohanong misyon.

Gipasabot sa pari nga ang kristohanong misyon maoy pagpadayon sa buhat sa kaluwasan nga gisugdan ni Hesukristo. Kini ang gitawag nga Misteryo Paskwal, kon diin nag-antus ug nagpakamatay si Kristo sa krus aron ang katawhan matubos gikan sa sala. Sa mga grasya nga ilang nadawat sa pagsangon sa tawag sa misyon, mapasalamaton gayud sila sa mga gasa sa Diyos Amahan. Human sa Santos nga Misa, gibasa ni Fr. Baño ang gilatid nga impormasyon bahin sa nagpadayon nga tinuig nga kalihukan sa Ebanghelisasyon sa simbahan sa Pilipinas, karon sa ika-lima nga tuig niini, hangtud sa umaabot nga tuig 2021. Nagsugod kini niadtong 2012, ‘Year of Faith,’ ang sinugdanan sa siyam ka tuig nga nobena sa pagpangandam sa 2021. Human sa pakigpulong, misunod ang takna sa socialization didto sa Lopez Park, siyudad sa Mati, nga nagtanyag usab ug ball games, parlor games, cultural and modern dances.

Hapsay ug han-ay ang lakat sa usa ka adlaw nga kalihukan nga gisalmutan sa mga hamtong ug mga bata, labi na sa mga talentadong sakop sa Diocesan Youth Apostolate (DYA), sa pagdumala ni Emcee ug Zone 3 president Sis Thelma Tajore. Sa katapusan, miluwat ug inspirational message si Sr. Florita Galido, MIC, sakop sa GKK Hesus Nazareno ug pangulo sa Association of the Religious in the Diocese of Mati (ARDM). Si Sr.Florita miingon nga dili makab-ot ang diwa sa pagka ‘mahalaron’ ug ‘mapasalamaton’ kung walay panaghiusa o ‘communion’ sa katilingban. Unya gawasnong nipadayag sa ilang maunongong pagpasalamat ang pipila ka mga representante sa mga sona. “Mapasalamaton kita sa kahiusahan sa mga GKK nga nakatabang sa pagpalig-on sa atong parokya,” maoy sulti ni Nila Japon, pangulo sa Sona 5. Ug gikan sa Sona 4, ang pangulo si Tita Ortega nipadayag nga “kun naa ang kahiusahan sa matag miyembro, magmalampuson gayod ang kalihukan tungod ug alang sa kahimayaan sa Ginoo. Kaniya ihalad ang atong bug-os nga pagpasalamat!”