Gipangusgan ang kampanya batok sa iligal nga droga

MATI CITY — Nakigduyog ang diyosesis sa Mati sa gipahingusgan nga kampanya batok sa illegal nga droga nga gipaduso sa probinsyal nga kagamhanan. Kini ang nasayran gikan ni diocesan coordinator Fr. Edilberto “Loloy” R. Mahinay sa iyang pakigpulong di palang dugay sa pundok sa kabatan-onan sa Diocesan Youth Apostolate (DYA) ug sa mga ginikanan sa Family life Apostolate (FLA) nga anaa ubos sa iyang responsabilidad isip director niini, samtang ang maong pari usab ang gitahasan sa paggiya sa programa sa ‘Voluntary Submission to Reformation’ (VSR). Gipahibalo ni Fr. Loloy nga sigun sa Philippine Drug Enforcement Agency (PDEA) niadtong 10 Nobyembre 2017, anaay 8,668 drug reformists sa tibuok probinsya ug nga gipaningkamutan sa DavOr, sumala usab ni Provincial Anti Drug Abuse Council (PADAC) officer ug Provincial Administrator Art Benjie Bulaong nga mahimong 80% drug cleared ang probinsya.

Sukad pa niadtong Hunyo 2017, gitahasan ang mga parokya sa pagpahigayon sa nagkadaiyang mga programa, kasagaran mga “counseling sessions” alang sa paggiya sa mga drug dependents and victims pinaagi sa FLA, DYA, ug VSR. Gani, nagkahiusa ang naasoy’ng mga pundok sa pagtukod sa mga core group nga maoy motutuk ug moplano sa mga buluhaton. Sumala pa, nagpadayon ang naasoy’ng mga programa sa pagtambag sa mga kabatan-onan ug ginikanan, labi na sa paagi sa pagtratar sa mga biktima sa droga. Gidugang usab ang kamahinungdanon sa gugma ug maayong relasyon sulod sa panimalay tungod kay kasagarang mga problema sa pamilya ang gamut-hinungdan sa pagkasukamud sa usa ka tawo sa mga ginadiling droga.

Kahinumduman nga sa miaging bulan sa Enero 2017, si Fr. Mahinay nagpakita sa suporta sa simbahan pinaagi sa VSR diha sa paglusad sa provincial government sa ‘Mamamayang Ayaw sa Anomalya, Mamamayang Ayaw sa Iligal na Droga’ (MASA-MASID). Gipasabot sa pari nga ang simbahan makiglambigit tungod kay hugot nga ginaduso niini ang pagtahud sa dignidad ug mga katungod sa katawhan, sama sa dakung tinguha usab sa gobyerno. Ang MASA-MASID nahisakop usab sa programa sa Ugnayan ng Barangay at Simbahan (UBAS) nga uban sa relihiyosong sector, nagtinguha sa paghulma sa “culture of transparency and good, clean governance.”

Gisuportahan usab sa simbahan ang “community based rehabilitation and after-care program” nga ilusad sa mga panggamhanang local (LGUs) pinaagi sa ayuda sa Provincial Anti-Drug Abuse Council (PADAC). Karong semanaha gihan-ay ang pagdeklara nga “drug-cleared” ang mga munisipalidad sa Banaybanay, Lupon ug Tarragona, kung diin ang tanang mga barangay nga nahisakop niini ang nakapasar sa mga giya ug mandatory requirements sa Dangerous Drugs Board (DDB). Kahinumduman nga niadtong 28 June 2017 nahiuna ang duha ka barangay sa Tubaon ug Tomoaong sa Tarragona nga opisyal nga gideklara nga ‘drug-cleared’ ug adunay 80 ka mga drug reformists. Dayon naghulat ang ubang mga barangay sa validation gikan sa oversight committee.

Gipasabot sa PADAC ug sa VSR nga lakip sa rekisitos mao nga ang usa ka barangay adunay plano nga gi-implementar ug gi-evaluate labot sa programa sa ginaabuso nga droga, ug nga natudluan ug na-organisa usab ang mga Tanod ug BADAC Auxiliary Team sa pagtuman sa ilang mga buluhaton sa kampanya batok sa “street level illegal drug trade.” Si Tarragona Mayor Nestor Uy miingon nga aron matabangan gayud ang mga drug reformists ug masumpo ang pagkalat sa droga sa iyang mga barangay, i-implementar sa iyang lungsod ang usa ka livelihood program alang sa drug reformists nga hatagan ug inisyal nga P1 milyon nga pondo gikan sa Department of Labor and Employment (DOLE).

Pagkakaron, tanang mga lokal nga hepe ehekutibo sa probinsya ang giingong nag-doble sa ilang mga paningkamot duyog sa simbahan ug ubang mga stakeholders aron mahunong ang kadaot gikan sa ‘drug abuse and trafficking.’ Mismong si Governor Nelson L. Dayanghirang sa iyang pakigpulong sa Joint PADAC and Provincial Peace and Order Council (PPOC) sa unang semana sa Nobyembre ang nagpahugot pa gayud sa laban batok sa iligal nga droga aron makab-ot ang “ambitious yet doable drug-free province.” “There should be no let-up in this matter,” dugang pa niya, “We should solidify our partnerships with all stakeholders on this cause. You should see to it that your people fully cooperate on this pursuit.” Gipahimangno usab sa opisyal ang mga nagpabiling biktima sa iligal nga droga sa pag-ingon nga “kung wala kini kahatag ug kaayo nimo, hunong na karon samtang dili pa ulahi ang tanan.”

Alerto usab ang kaparian, matud pa ni Fr. Mahinay, pinaagi sa paghatag ug mga pagtambag diha sa ilang mga wali ug ubang mga social occasions aron mapahinumduman ang katawhan kalabot sa hustong tawhanon ug ispirituhanong pagkinabuhi sa yuta isip mga anak sa Diyos ug managsuon sa usag-usa.