70 ka pawikan gibuhian

Naningkamot karon ang usa ka dakong kompaniya sa suga nga makatampo alang sa pag-preserbar sa ekolohiya pinaagi sa pagbuhi ug 70 ka mga bag-ong napusa nga endangered species nga mga pawikan.

Gibuhian ngadto sa ilang natural nga pinuy-anan sa dagat sa Punta Dumalag ang mga hawks bill turtle sa Aboitiz Cleanergy Park sa Davao Light and Power Company (DLPC), Matina Aplaya niadtong Biyernes, Nobyembre 10.

Ang maong mga pawikan giila nga hawks bill turtle nagapangitlog lamang sa puti nga balas.

Sumala sa Community Relation Manager Fermin P. Edillon, nakaplagan ang nest sa maong pawikan niadtong Setyembre 24 niining tuiga lamang ug napusa adtong biyernes. Gibuhi-an dayon sila pagkahapon tungod kay sumala sa pagtuon nga sulod sa 24 oras mabuhian adunay posibilidad nga mobalik kini sa lugar hain sila giitlog.

Nahibaloan nga sa usa ka pangitlog sa pawikan mokabat sa 150 hangtod 200 kaitlog, apan 85% lamang ang mapusa, ug ang mabuhi anaa sa 1-3% hinungdan nga kinahanglan silang mabuhian aron matagamtaman ang ilang natural nga puluy-anan.

Ang mga pawikan sa pagkakaron gikonsidira nga ‘endangered species’ buot pasabot nga gamay nalang ang ilang banay. Ang Aboitiz Cleanergy Park naglaum nga adunay laing tulo ka nest sa pawikan ang mapusa niining tuig.

Mikabat na sa 2,899 ka hatchlings sa pawikan ang nabuhian sa Aboitiz Cleanergy park sukad niadtong tuig 2014, samtang niining tuig mikabat sa 1,023 na ang nabuhian sa kadagatan.