The 13th Day

OMPH Parish

“Inig ka trese nga adlaw sa bulan sukad karon, bisitaha ko ninyo dinhi,” ingon sa Birhen sa Fatima sa tulo ka bata nga sila Lucia, Jacinta ug Francisco. Karong tuiga ginasaulog sa tibuok simbahan ang centennial anniversary o ika usa ka gatos nga tuig sa pagpakita sa Birhen sa Fatima, Portugal nga mahitabo na karong Oktobre 13, 2017. Isip pagsaulog niini sa lokal nga simbahan dinhi sa Davao, ang marian devotees nagpasiugda ug “The 13th Day,” maong niadtong September 13, 2017 ang ika 5 nga bulan sa the 13th Day centennial celebration of Our Lady of Fatima gisaulog sa Our Mother of Perpetual Help parish (Redemptorist) Bajada, Davao City.

Niabot ang imahe sa mga alas 9:00 sa buntag kauban ang mga marian devotees nga maoy nagpahilona niini. Ang mga marian devotees nanghatag ug mga rosaryohan, rosary guide, divine mercy pictures, ug Fatima prayers nga gigamit sa panahon sa pagrosaryo niadtong adlawa.

Human sa pagrosaryo misunod ang pagpaambit ni Inday Banquerigo mahitungod sa Fatima. Human gisundan ug paghalad ug bulak ngadto sa Birhen. Samtang nagsugod ang kumpisal, sa pagka 11:45 nagsugod ang nobena si Eric Paul Soliven Sevencruz, seminarista sa Redemptorist Community.

Pagka alas 12:00 sa udto nagsugod ang Santos nga Misa nga gisaulog ni Fr. Manuel Thomas CSsR uban sila Fr. Ben Ma, ug Fr. Mario Masangkay CSsR.

Sa homiliya ni Fr. Thomas, nag-ingon siya nga ang pagtubag ni Maria sa gisulti kaniya sa anghel, “Be it done to me according to your word,” mao ang nakapahimo niyang faithful sa pagtuman sa mga plano sa Dios alang kanatong iyang mga katawhan. “Obedience to the will of God. Mary kept the faith and so must we,” ingon niya. Ang Birhen sa Fatima naghatag ug mensahe sa tulo ka bata sama sa pag-ampo ug rosaryo matag adlaw, pagsuot ug brown scapular, consecration to the Immaculate Heart of Mary- matag unang Sabado sa bulan, pagkumpisal ug pagkalawat, pag-ampo sa Santo Papa, ug pagsunod sa kabubut-on sa Ginoo.

Kining the 13th day ginabuhat pinaagi sa pagbalhin balhin sa imahe sa lain-laing parokya sa arkidayosis sa Davao sukad niadtong Mayo 13, 2017. (Marietta Comighud | OMPH SoCCom)