“Sulod sa 100 ka tuig, Inahan ka gayud”

Maria man ang iyang ngalan, apan daghan ug nagtawag kaniyag “Inahan.” Sa ika-100 ka tuig sukad sa iyang pagpakita sa Fatima, Portugal, si Maria, Inahan sa Diyos kon ginatawag nga “Birhen sa Fatima” sa iyang mga deboto, nagapadayon sa pagpahinumdum sa iyang mensahe sa iyang mga anak bisan usa ka gatos ka tuig na ang milabay.

Gisaulog sa simbahan sa Arkidayosis sa Davao ang ika-100 na nga tuig sa iyang pagpakita niadtong Oktubre 13, 2017 sa San Pedro Cathedral, uban sa atong Arsobispo sa Davao Romulo G. Valles, D.D. nga maoy nagsaulog sa Santos nga Misa. Gitambongan ug daghang deboto, ang maong selebrasyon usa lamang ka timaan sa pagka-‘mama’hon sa mga Pilipino.

“Nitulo akong luha pagkakita niya, gimingaw kong Maria,” sigun sa usa ka deboto samtang nakakita siya kang Maria sa Abreeza. Ang “Marian exhibit” usa lamang sa mga aktibidad alang mas mapakaylap ang mensahe sa Birhen sa Fatima. Ang maong exhibit gisugdan niadtong Oktubre 4-13 diin adunay Santos nga Rosaryo, Santos nga Misa, Inputs, ug Nobena. Kini pud gitawag nga exhibit tungod kay 13 ka imahe sa Birhen sa lain-laing titulo ang gisaninaan ug mga lokal nga mga stylists. Una sa exhibit, aduna pud pagtuyok-tuyok sa imahe sa mga nagkalain-laing parokya sa tibuok Arkidayosis diin gitawag kani ug “The 13th Day.” Ang “The 13th Day” gipangulohan sa mga Marian devotees sa Davao.

“Magbirthday imong mama, handaan man gani nimo, unsa na kaha ning nag 100 years na atong Mama sa Ginoo,” ingon ni Dennis Asumbrado, usa sa nagpreparar sa maong “Marian Exhibit.” Gipangulohan ang maong pinakaunang “Marian Exhibit” sa Davao Verbum Dei Media Foundation Incorporated ubos sa Archdiocesan Commission on Social Communications. @dcherald