St. Jude mibisita sa iyang mga GKK

Nagpanaw-duaw kon “Pilgrimage” ang katilingban sa GKK Sto. Nino Magallanes nga sakop sa parokya sa St. Jude Thaddeus niadtong Setyembre 21, 2017, alas 7:30 ang takna. Kini ang unang gabii sa “Panaw-duaw” nga gisugdan agi’g pagpangandam sa umaabot nga pagsaulog sa ika-52 nga kapistahan sa patron sa parokya.

Buhaton kini matag gabii ngadto sa 26 ka GKK nga sakop sa parokya sa St. Jude hantod mahuman kini karong Oktobre 16, 2017. Adunay gihikay si Padre Pete Lamata mahitungod ni San Judas Tadeo ang patron sa paglaum ug niadtong anaa sa malisod nga kahimtang. Layon sa maong katekesis sumala ni Padre Pete Lamata nga mahatagan ug batakang kahibalo ang katawhan ug mga parokyano kabahin sa kinabuhi ug misyon ni San Judas Tadeo, ang Patron sa Parokya.

Dili kini hingpit ug kumpletong pagsaysay sa mga detalye sa kinabuhi ug misyon sa patron sa parokya, apan, gipanghinaot nga kini makatabang sa dugang pag-ila ug pagpalawom sa kahibalo mahitungod sa santos. Aron ang atong debosyon mamahimong makahuluganon, mabungahon ug mapadayonon. (Ester Constancio Florece | SJTP SoCCom)