“Rest rest din pag may time”

Ang mga Pangulo sa Katilingban (PSK) sa Parokya sa St. Mary of the Perpetual Rosary sa pakighiusa sa Kura Paroko, Fr. Jesus Samaniego sa paggahin sa usa ka adlaw nga panahon sa pakig uban sa mga PSK didto sa Bukidnon niadtong Agosto 28, 2017. Gisaulog ang Santos nga Misa nga gipangulohan ni Fr. Jess sa Monastery of Transfiguration, diin iyang gipaambit sa mga PSK ang kamahinungdanon sa pagtahan sa kaugalingon aron alagaran ang mga miyembro sa katilingban, bisan pa usahay adunay kalisdanan ang pagpatuman sa mga gimbuhatan diha sa Simbahan. Igahin kining usa ka adlaw sa pagpamalandong diin kini usa ka gasa nga madawat sa matag usa, ang pakighiusa sa misyon ni Kristo.

Nasinati sa mga PSK ang tinuod nga panag-igsoonay ug kinaiya sa matag usa pinaagi sa mga pag-inambitay sa mga kasinatian sa ilang kinabuhi isip pangulo sa katilingban, ug sa personal sama sa pamilya ug trabaho. “Isip PSK dako ang akong kalipay nga nahatagan kami ug isa ka oportunidad nga nakighiusa ang among Kura Paroko nga si Fr. Jess Samaniego sa usa ka adlaw sa pagpamalandong. Nasinati nako ang panaghiusa ug kalipay sa mga PSK sa nagkadaiyang GKK,” ingon ni Edith Ibañez usa ka PSK.

Napakita usab ang pagka maalagaron ug pasensya sa matag PSK, diin nagtinabangay kini sa mga gimbuhaton ug mapailubon sa paghulat sa uban.

Talagsaon ra kini nga higayon nga nagkahiusa ang mga PSK sa pagpamalandong unta mapuy-an kini sa matag usa diha sa ilang kinabuhi ang kinaiya sa pagka maalagaron diha sa tagsa-tagsa nila nga katilingban. (Hermie Mapute | SMPR SoCCom)