Parokyano gitudloan unsaon pagpanginabuhi

36 ka benepisyaryo nigradwar sa skills training nga gipahitabo sa Sto. Rosario Parish of Toril niadtong Sept. 24, 2017 sa Sto. Rosario Formation Center isip tabang sa simbahan sa ilang mga parokyano aron dugang kahibalo unsaong pagpanginabuhi sa ginagmay nga paagi.

19 ang nigradwar sa Bread and Pastry Production NC II ug 17 sa Shielded Metal Arc Welding NC I. Ang training sa Bread and Pastry gisugdan niadtong April 29 hangtod August 5, 2017. Kini mikabat sa 141 hours. Ang welding nidagan ug 34 ka adlaw, 17 ka semana ug 2 ka adlaw taga semana. Sabado ug Domingo ang klase.

Pagkahuman sa ilang klase giandam na dayon ang mga partisipante sa assessment ug accreditation. 100 percent ang nakapasar sa gihimong assessment.

“Kung unsa ang inyong natun-an hianut nga inyong gamiton. Ang skills certificate of training makatabang sa inyo,” sumala sa Center Administrator RTC Kor-Phil Davao Mr. Egmedio O. Valdez Jr.

Mensahe ni Fr. Roy Mejias, kura paruko, “Ang punto sa parokya dili lang mangayo kondili motabang sa kabuhian kay kini mobalik lang gihapon sa parokya.”

Plano ni Al Pojas, usa sa mga nigradwar nga mopadayon ug eskwela para makatake ug Methodology Training aron siya na ang magtudlo sa ubang parokyano sa Toril. Si Karen Emperado, nagplano usab nga magtukod ug bakery.

Mapasalamaton usab si Ma. Catherine Christie Fuentes sa parokya sa TESDA ug sa mga Pangulo Sa Alagad (PSA) ilabi na gayud kay Bro. Ernesto Basmayor, PSAM coordinator nga napatuman ang maong training. (Juneva Ardepolla | SRP SoCCom)