Pagdawat sa Sakramento sa Pagkompirma gipahigayon

“Ang sacramento sa pagkumpirma nga gihatag sa Ginoo nato, mao’y mutabang nato nga atong palihokon ang mga gasa sa bunyag.” – Archbishop Valles

Gipahigayon sa parokya sa San Francisco de Asis – Tagakpan ang pagdawat sa sakramento sa pagkumpirma niadtong Setyembre 24, 2017. Dul-an 300 ka mga parokyano nga naggikan sa nagkadaiyang Gagmay’ng Kristohanong Katilingban nga nahisakop sa maong parokya ang nidawat sa maong sakramento. Kini gisugdan sa Santos nga Misa sa alas 9 sa buntag pinanguluhan sa atong Arsobispo sa Davao, Most Rev. Romulo G. Valles, D.D.

Sa homiliya sa Arsobispo, iyang gipunting ang importansiya sa pagduol ug pagpaminaw sa Diyos. Dugang pa niya, dili kita mag-agad sa atong kaugalingong mga laraw kay “sa lakaw sa kinabuhi, importante nga we get to know God para ma-gets nato ang style sa Ginoo.” Gisunod niini ang pagpahigayon sa pagsaulog sa rito sa kompirmasyon diin ang mga pagakumpirmahan naghinumdom sa pagtuo nga ilang gipadayag uban sa katolikong simbahan panahon sa bunyag inubanan sa ilang ninong ug ninang ug mga ginikanan.

Sa pakighinabi sa Pangulo sa Pagpanudlo Coordinator nga si Rosalinda Monreal, siya nanghinaut nga ang mga bag-ong kinumpirmahan mamahimong aktibo sa komunidad ug sa simbahan. Dugang pa niini, nanghinaut sab siya nga mabuhi ang espiritu sa tinuoray nga pagpanerbisyo labi na sa pagsaulog sa Santos nga Misa.

Malipayon nga gidawat ni Anna Jane Goc-ong ang maong sakramento inubanan sa suporta sa iyang tibuok pamilya. Nanghinaut ang iyang mga ginikanan nga magpabilin siya nga maayong anak, dili lang sa ilaha, kun dili labi na jud sa Ginoo nga mao’y tinubdan sa kinabuhi ug sa tanang maayong butang. (Rizzel Mae C. Daya l SFDA SocCom)