Obispo sa Marawi: malipayon nga magul-anon

Malipayun nga magul-anon, mao kini ang gibati ni Bishop Edwin Dela Peña sa kasamtangang kahimtang sa Marawi City diin siya ang nahimong Obispo sa lugar.

Sumala sa exklusibo nga pakighinabi sa maong Obispo atol sa Mindanao-Sulu Pastoral Conference XVI sa Waterfront Insular Hotel niadtong Oktobre 16-20, nga sa pagkamatay sa mga terorista nga si Isnilon Hapilon ug Omar Maute kinsa mao ang mga giilang opisyal sa mga lokal nga teroristang Maute, sensyales na kini nga hapit na mahuman ang kagubot sa lugar. Aron maka balik na ang mga Internally Displace Person (IDP) kon bakwit sa ilang pinuy-anan, human sa pipila ka buwan nga mi-ikyas tungod sa giyera.

Apan iyang giklaro nga ang iyang pagmaya dili sa kamatayon ni Omar ug Isnilon, apan sa makapahulay na ang lugar sa kagubot.

Dugang ni Bishop Dela Peña nga nagmaya siya nga nakalingkawas nga buhi si Fr. Chito Suganob gikan sa kamot sa mga Maute human sa tulo ka bulan nga pagka kidnap.Gipaambit sa Obispo nga niadtong una sila nagkita pag balik ni Fr. Chito human makalingkawas sa mga Maute, nalooy siya sa kahimtang sa maong pari, tungud kay migakos kini kaniya nga mitiyabaw, dala ang sensyales sa trauma nga iyang naagian sa gyera.

Sumala pa nga mipaambit kaniya si Fr. Chito, nga daw sama kinig ulod nga nagkamang tungod sa kalisod nga iyang natagamtaman, partikular nga miagi kini sa delikadong kahimtang kuyog ang mga armadong terorista.

Adunay laing tulo ka kauban si Fr. Chito nga nakalingkawas sa mga Maute, apan ang ilang kalipay adunay kalakip nga kaguol tungud duha sa ilang mga working scholars, nakabsan sa kinabuhi tungud sa air strike.

Hinoon si Bishop Dela Pena nagbutyag nga sa nahitabong giyera, nakita gayud niya ug nasaksihan ang panagtambayayong sa matag usa, ilabi na ang mga Muslim ug Kristiyano arun makasugakod ug kuyog nga magmadaugun sa hagit sa panahon.