MSPC delegates mopaambit sa pagtulon-an sa mga GKK

MATI CITY — Ang onse nga mga delegado gikan sa Mati ngadto sa Mindanao-Sulu Pastoral Conference (MSPC) XVI sa dakbayan sa Davao nagtinguha nga mapaambit ang kinatibuk-ang nakutlo nga mga pagtulon-an sa kumperensya ngadto sa mga Gagmayng Kristohanong Katilingban (GKK) pinaagi sa Diocesan GKK Congress karong Nobyembre 22-24, 2017 sa Mati. Ipahigayon kini sa St. Therese Gym sa Clergy House Compound sa Madang ug motapos sa kasaulogan sa Eyukaristiya sa San Nicolas de Tolentino Cathedral. Magsilbi usab kini nga opisyal nga kulminasyon sa kasamtangang tuig sa parokya kansang tema mao ang “Pagtukod sa Gagmayng Kristohanong Katilingban isip lumilihok sa Kahiusahan sa Pagsalmot ug sa Misyon.” Matud ni Apostolic Administrator Msgr. Edito S. Baño, ilakip usab ang diwa ni Birhen Maria, ang modelo nga disipulo diha sa pagtukod ug katilingban nga abli sa Balaang Espiritu, masalmoton, maakuhon, maloloy-on, matinabangon sa mga kabus, ug madasigon sa pakig-dayalogo sa mga Kristiyano-Muslim-Lumad aron makab-ut ang kalinaw ug kahiusahan, ug sa kinatibuk-an masangyaw ang matuod nga Gingharian sa Amahan.

Mosalmot dinhi ang tanang parokya nga mopadala sa ilahang mga pangulo sa GKK, 5 ka mga pastoral council members, tanang mga apostolate coordinators, mga representante sa mga laykong pundok — organizations ug movements; ingon man ang mga paring diyosesano ug relihiyoso, ug mga madre ug brothers sa nagkadaiyang kongregasyon. Ang mga MSPC delegates nga manguna sa mga pagpaambit mao sila: Msgr. Edito S. Baño ug mga diocesan apostolate directors—Frs. Darwey P. Clark, Barry Gil R. Pilar, Medardo A. Salomia, Jay B. Ramos, Joel A. Sayson, Uldarico A. Toroba, ug Elezer D. Pagkilatan; Rev. Raphy M. Armasa, ug sila Mr. Saturnino Sibbaluca ug Roland Dalagan. Ang mga delegado gikan sa mga parokya ang i-akomodar sa mga ‘foster families’ sa mga parokya sa Mati—ang San Nicolas de Tolentino Cathedral, Divine Mercy, ug Don Bosco. Si Msgr. Baño mo-preside sa Opening Mass samtang si Davao Archbishop Romulo G. Valles ang manguna sa 9:00AM Culminating Mass sa katapusang adlaw.