‘Laudato Si’ gipangusgan sa Mati

MATI CITY — Ang Kapunongan sa mga Pangulo sa kapilya (KPK) sa parokya ni San Nicolas de Tolentino, Mati Cathedral, nag-awhag sa mga Gagmay’ng Kristohanong Katilingban (GKK) sa pagdawat ug pagsugod na sa “Home Farming” ug “Container Gardening”.

Ang maong tumong sa Green Community Program nga gihaum sa Barangay Integration Development and Action (BIDA) program nga gidumala ni Bise Mayor Glenda Rabat Gayta mao ang: (1) pagpalambo sa relasyon diha sa pamilya, (2) kasiguruan sa pagpili unsay angay kaunon, ug (3) pagkunhod sa mga basura tungod kay gamiton na ang mga plastic ug tin can containers nga mahimong maoy tanuman.

Giawhag sab sa Bise Mayor Glenda Rabat Gayta ang unom ka distrito nga sakop sa parokya, nga kining Green Community mamahimo usab ka Income Generating Project (IGP) alang kanila aron makatabang sa panginahanglan sa ilang pamilya.

Mapasalamaton kaayo ang KPK sa Bise Mayor nga maikagon gayud nga misangyaw niining programa tungod kay kabahin usab kini sa atong tubag sa tawag ni Sto.Papa Francisco sa iyang Encyclical Letter: “Laudato Si” nga mahitungod sa pag-atiman sa atong yutan-ong pinuy-anan kon “Care for the Common Home.” (with Erlinda Mahumot)