Gisaulog ang ika-41 ka tuig nga Anibersaryo sa ACCRCD

Ang Archdiocesan Catholic Charismatic Renewal Communities of Davao (ACCRCD) madayegon ug mapasalamaton sa Labawng Makagagahum sa kalampusan sa ika-41 ka tuig nga anibersaryo niadtong Oktubre 15, sa Christ the King Formation Center, Bago Aplaya, Davao City, subay sa tema nga “Simbahan ug Estado Nagkahiusa diha sa Gugma ug Gahum sa Espiritu ni Kristo Hesus alang sa mga Pilipino.”

Adunay kapin 600 ang mitambong nga gilangkuban sa mga bata, mga batan-on, ug mga hamtong. Ang maong usa ka adlaw nga kasaulogan gibahin sa duha. Sa buntag, gisugdan kini sa Enthronement of the Bible and Mama Mary nga gisundan sa Praise and Worship nga gipangulohan sa Blessed Children of Jesus Community. Usa ka “overview” mahitungod sa Phil CCRS VisMin Conference sa milabay nga Setyembre 2, didto sa Cebu City ang gipadayag ni Bro. Abraham O. Domingo (ACCRCD Coordinator) diin iyang gisaysay isip balik – lantaw kanus-a ug giunsa pagsugod ang International Catholic Charismatic Renewal lakip na ang sa nasud Pilipinas. Dugang pa niini, iya usab gipaambit nga ang “Charismatic Renewal is a personal experience of the presence and power of the Holy Spirit, who brings alive in new ways the graces of our Baptism. The Holy Spirit not only sets on fire all that we have already received, but comes again in power to equip us with His gifts for service and mission.” Pagkahuman sa pagpaambit gisunod dayon ang Healing Session, ug ang Holy Mass nga gipangulohan sa ACCRCD Spiritual Director nga si Msgr. Paul A. Cuison, uban sa kanhiay nga Spiritual Director, Rev. Fr. Jose Marie Z. Escuadro nga ang ilang pagpakig-ambit naghatag ug kadasig sa matag usa.

Sa hapon, ang selebrasyon giablihan sa usa ka Doxology, gisunod ang opening production number sa ACCRCD Youth, Community Banner’s Parade nga gipangunahan sa mga coordinator, welcome remarks, testimonies nga nagpadayag sa kaayo sa Ginoo. Aduna usab presentations/variety show gikan sa nagkalain-laing parochial ug trans-parochial communities. Ang closing remarks ug pag-ampo gipangulohan ni Bro. Dennis T. Mabayao (ACCRCD Asst. Coordinator) ug fellowship songs isip panapos. (Charise G. Ferraren)