‘Blessing’ sa bag-ong simbahan sa Tarragona

TARRAGONA, DAVAO ORIENTAL — Gisaulog ang ika-35 nga kapistahan sa parokya ni San Pedro Claver sa Tarragona niadtong Setyembre 16 pinaagi sa solemneng dedikasyon ug panalangin sa bag-ong natukod nga simbahan.

Alas 9 sa buntag gisugdan ang dedication/blessing ug Santos nga Misa nga gipangunahan ni Davao Archbishop Romulo G. Valles D.D., inubanan ni Bishop Emeritus Patricio H. Alo, Msgr. Edito S. Baño, Fr. Edilberto L. Mahinay ang kura paroko, ug laing 22 ka mga paring niuban ug selebrar sa maong misa. Si Abp. Valles usab ang nagwali kabahin sa mahinungdanong buhat sa katawhan sa pagtukod ug bag-ong simbahan ug sa diwa sa “komunyon” alang sa tuig sa parokya subay sa tema: “Tuig sa Parokya isip Mag-inambitay nga Katilingban.”

Mitambong ang tanang mga parokyano ug opisyales sa parokya, ingon man mga opisyales sa probinsya ug munisipalidad ubos sa liderato nila Gov. Nelson L. Dayanghirang, Mayor Nestor L. Uy ug Vice Mayor Edelyn Bualan. Nasayran nga dako ang gikadasig sa mga parokyano sa diwa sa pag-inambitay diha sa nagkadaiyang mga pundok ug apostolado, labi na sa pagpabag-o sa ilang simbahan, nga wala magpasabot usa lang ka “building” kondili ang ilahang kalig-on ug kaunongan isip usa ka katilingban sa parokya, ang mas dakong pamilya sa Diyos, ug sa mga sanga-sanga niini diha sa mga Gagmayng Kristohanong Katilingban (GKK).

Mapasalamaton usab si Fr. Mahinay sa iyang nasinati nga kooperasyon sa katawhan sa tanang mga kalihokan, lakip ang “War on Drugs” kon diin pinaka-una ang Tarragona nga nadeklara nga “Drug-free Municipality.” Hinoon, giduot niya ang importansya sa papel sa mga ginikanan diha sa mapadayunong paglambo sa banay sa ispirituhanong kinabuhi, partikular ang paggiya sa mga batang anak. Lakip sa mga pag-ampo ang pag-angkon sa kalinaw ug kahiusahan, ug paglikay sa panaggubat. Gipahigayon usab ang mga dula sa isports ug matag gabii nga kalingawan nga gipaluyuhan sa piniling mga sponsors. Gikalipay gayud sa kura nga nagpabilin ang gidaghanon sa mga katoliko sa mga 75% sukad sa natukod ang parokya niadtong 16 Setyembre 1982.