LOMA nagkatigum alang sa pista

MATI CITY — Nagtigum ang mga pangulo sa Lay Organizations Movements and Associations (LOMA) sa parokya ni San Nicolas de Tolentino Mati Cathedral niadtong ika-21 sa bulan sa Agosto. Kini gipaluyuhan sa Parochial Vicar nga si Fr. Perfecto “Jojo” M. Urbuda nga mirepresenta sa kura paroko ug Apostolic Administrator Msgr. Edito S. Baño.

Nagkahiusa ang pundok sa pagplano alang sa kalampusan sa gipangandaman nga mga Kristohanong Kalihukan nga angayan tutukan. Nag-una na niini ang ika-81 ka tuig sa pagsaulog sa kapistahan sa mahal nga patron, San Nicolas de Tolentino karong Domingo, Setyembre 10, 2017. Gipakita ug gipasabot ni Pastoral Consultative Council (PCC) President Carlos Milan ang naihan-ay na’ng mga kalihukan aron maaprobahan kini ni Fr. Urbuda.

Nagbinayloay og mga sugyot ang matag-usa aron makab-ot ang kahiusa alang sa kalamboan sa parokya hilabi niining pagsaulog sa “Tuig sa Parokya isip Mag-inambitay nga Katilingban”.

Maikagon nga nipadayag si Fr. Jojo sa iyang mga pamaagi nga nagdala og kausaban ug kabag-ohan, butang nga nakaaghat sa LOMA ug mga Apostolado nga mag-una gayud diha sa pagpadayon sa misyon sa simbahan.

Sa katapusan, gitataw sa pari nga ang tanang mga laraw mamahimong malampuson pinaagi sa diwa sa pagkamanggihatagon sa mga parokyano sa ilahang panahon, talento ug bahandi, inubanan usab sa makanunayong pag-ampo. (Erlinda Mahumot)