Kita Magbalantay sa atong mga Kaigsoonan

23rd Sunday of Ordinary Time – A
September 10, 2017

Sa wala pa moabot si Ferdinand Magellan (1521) ug si Miguel Lopez de Legazpi (1565), ang katawhang Pilipinhon nanagpuyo isip pundok sa tribu nga gitawag ug balangay. Unsay tumong nila sa pagpuyo sa ingon? Tungod kay daghang mga nagkalainlaing tribu sa ilang palibot, ug mao nga nagtinabangay sila sa pakig-away batok sa mga “intruders” o mga kaaway. Sa na “civilized” na ang katawhan, sila napundok ngadto sa “sitio”, ngadto sa “barangay” kon barrio hangtud sa lungsod ug sa syudad.

Sa laing bahin usab, ang Simbahan nga tinukod ni Jesus gikan sa gamay nga binhi hangtud nga midako kini. Ang Simbahan nahimong katilingbanon (communal). Mao nga sa malukpanon (Catholic / Universal) na ang Simbahan, natukod ang mga Diyoseses ug gibahin usab kini ngadto sa mga parokya, ug kay ang mga parokya medyo dagko man pod, ug mao nga nanagsang (mushroom) ang mga Gagmay’ng Kristohanong Katilingban kon GKK. Ang maong katilingban nagtinabangay sa material nga mga panginahanglan, ug sa ilang espiritwal nga panginahanglan. Si Jesus wala magtukod ug Simbahan nga Federasyon sa matag matoohon. Si Jesus nagtukod gayud ug Simbahan isip usa ka organism. Ang tanang sakop gitawag niya ngadto sa kahiusahan isip usa ka persona, usa ka lawas, ang lawas ni Kristo kay kanunay man Siya naga-uban sa Iyang Simbahan.

Sa laing bahin, ang maong GKK naglarawan sa dakong Simbahan sa kahiusahan. Apan hinonoa, bisan sa maong tumong sa kahiusahan, ang Simbahsn kanunay man gayud ginahadla o ginahulga sa mga pagsulay sa pagpukan niini gikan sa laing panig sa katilingban. Bisan kon mga binunyagan ang mga sakop sa maong Simbahan ni Cristo, apan daghan gihapon ang panagbingkil sa hunahuna, sa pulong ug sa buhat. Mao nga si Jesus miingon nga ”Kon ang imong igsoon nakasala batok kanimo, adtoa siya ug sultihi siya sa iyang mga sayop. Kon dili siya maminaw nimo, hangyoa ang imong mga higala nga mahimong mga saksi tali ninyong duha isip saksi. Kon dili pa gayud mosugot, nan hangyoa ang tibuok Simbahan sa pagtabang kanimo, ug uban pa.” (Matt. 18: 15 ff). Sa maong paagi maningkamot gayud kita sa pagpakig-uli sa usa’g-usa.

Kita ang Lawas ni Cristo. Mao nga mosimba kita matag Domingo aron mahimo kitang buhing Katilingban nga maampoon. Ang usa ka tawo dili makahimo’g katilingban nga usa ra. Gikinahanglan nato ang usa’g usa. Ug dili pod nato mahimo ang pakighiusa kon wala kita’y koneksyion sa Ginoo, kay Siya man ang Ulo (head) ug ang Kasingkasing (heart). Mag-ampo kita kanunay sa Dios aron kanunay kitang nahiusa isip Katilingban sa Gugma, nga mao ang talikala kanato isip Lawas ni Jesus ug kita ang Simbahan. (Rev. Msgr. Bonie L. Burlaza, SThD, HP)