Inter Mirifica Seminar sa OMPH Bajada

Padayon ang paghatag sa Research and Training Department pinaagi sa Trainer’s Pool niini sa mga GKK Social Communications Committee (SoCCom) ug pagtulon-an kabahin sa social communications document sa atong Simbahan.

Nagpahigayon ug “Inter Mirifica” seminar alang sa mga Pangulo sa Katilingban ug GKK SoCCom ang Parish SoCCom Coordinator nga si Marieta Comighud kauban ang guest facilitator Flor Deloria SocCom (Coordinator sa Holy Family Parish – Sto. Rosario Vicariate) niadtong Setyembre 3, 2017 sa buntag.

Nagtuon ang 44 ka partisipante ug napaklaro pag-ayo kanila ang gahom sa midya sa komunikasyon labi na sa atong panahon karon.

Nalamdagan ang ilang panghunahuna nga aduna gayud diay mandato ang Simbahan alang sa iyang katawhan sa aktibong pag-apil aron ang mga katingalahang butang nga atong nasinati karon sa natad sa midya makahatag ug dakong kaayo ug dili lang kadaot. Napasabot sad nga ang matag usa adunay katungdanan sa pagpili ug unsa ang angay tan-awon, basahon ug ipasa ngadto sa uban.

Gisaysay sab nga karon na ang tamang panahon sa pagpakabana sa pagpagawas sa kamatuoran sa mga isyung mitumaw sa katilingban hilabi na bahin sa Ginoo.

Ang presensiya ni Fr. Ritsche Gamaya, Managing Director sa Davao Verbum Dei Media Foundation, Inc. nakadugang ug kadasig ug kalipay sa mga nanambong.

Makatakod ang iyang kadasig nga mapadayon ang mga nasugdan nang mga kalihukan alang sa pagtuman sa gipangayo sa “Inter Mirifica” sama sa pag subscribe sa Davao Catholic Herald newspaper aron madugangan pa ang kapin 3,000 ka subscribers gikan sa 1.4 milyon nga Katoliko sa Dabaw; pagpaminaw sa DXGN 89.9 Spirit FM hilabi na sa mga programa nga motubag sa ilang personal nga panginahanglan ug ang pagpaningkamot nga magamit ang social media sa pag-share sa mga FB live coverage sa misa.

Gipahibalo ni Fr. Gamaya ang bag-ong programa nga “Ipagdarasal Kita” diin sa kantidad nga P100, mamahimo nang magpadangat sa petisyon panahon sa birthday, healing, thanksgiving, ug uban pa. (Marieta Comighud | OMPH SoCCom)