Inter Mirifica: Pondasyon sa pagsangyaw

Artista sa una, magsasangyaw na. Usa lamang kana sa iyang giapilan sa simbahan sa pipila ka posisyon na iyang naagian. Si Genaflor P. Lastimoso, 46 ang edad, gikan sa kapilya sa Sta. Teresa de Avila, Maglana, sa parokya sa Our Mother of Perpetual Help, Bajada, Davao City, usa ka aktibong magsasangyaw na. Pangulo sa Katilingban, Katekista, Education Committee, Magbabasa (Lector), artista sa usa ka mini film contest sa Redemptorist Community diin nadaug siya nga best actress, ug karon usa na ka myembro sa Social Communications kon SoCCom sa ilahang parokya si Genaflor miingon, “maayo na nga himan sa pagpadayag sa pagtoo,” iyang sulti mahitungod sa inter-mirifica.

Setyembre 3, 8:30-12 sa hapon, nagpahigayon ug inter-mirifica (usa ka dokumento gikan sa Vatican II diin gipasabot sa maong dokumento nga mapakaylap ang maayong balita pinaagi sa radio, t.v., dyaryo kon media) sa Our Mother of Perpetual Help Parish diin kini gitambongan sa 40 kapin nga mga Pangulo sa Katilingban (PSK) ug secretary sa 33 ka Gagmay’ng Kristohanong Katilingban (GKK). Sa nasabutan, ang usa ka secretary automatiko nga SoCCom. Kining mga SoCCom sa matag parokya ug GKK kinahanglan hawud mahitungod sa news writing, inter-mirifica, ug minutes taking kay sumala pa sa Research and Training Head sa Archdiocesan Commission on Social Communications (ACSC) Cheryl Vilog, “Basic skills kasi ito (news writing) to become effective in communicating. Inter-mirifica is the foundation of the heart to evangelize, while minutes taking is the foundation of the hands to serve.”

Ang maong topiko gihatag sa Parish SoCCom Coordinator Marietta Comighud diin iyang gipasabot sa mga SoCCom ug PSK ang detalye sa maong dokumento. Sigun niya, “maskin among makita nga wala pa gayud kaayo nailhan ang katolikong radio (DXGN 89.9) ug katolikong dyaryo (Davao Catholic Herald) sa mga katawhan, among ginapaningkamotan nga mahibal-an kini sa kadaghanan, ug nagpasalamat kami na dako pud ang suporta kanako sa mga myembro sa simbahan ilabina among parish priest.”

Ang inter-mirifica usa lamang ka ang-ang aron magpadayon ug pagsulat ang mga SoCCom ug mga nindot nga balita gikan sa ilahang mga GKK ug parokya. Gani ingon sa usa ka SoCCom sa GKK Birsaba Ronilyn Catayas, “maayo kini nga pamaagi sa simbahan para sa padayon nga pag communicate sa iyang katawhan nga atoa sa mga lagyong dapit nga wala ma-update sa atong kalihukan.” Natapos ang maong kalihukan sa paghatag ug gamay’ng inspirational talk sa Director sa Archdiocesan Commission on Social Communications (ACSC) Fr. Ritsche Gamaya diin siya miingon nga kining tanan usa ka pagsangyaw sa maayong balita pinaagi sa media, ug iyang napaambit ang mga SoCCom nga anaa sa mga bukid mahitungod sa ilang paningkamot sa pagsulat ug balita luyo sa kalayo, wala usahay internet o sa kadaghan pang katungdanan.

Ang Research and Training Department sa Archdiocesan Commission on Social Communications (ACSC) nga gipanguluhan ni Cheryl Vilog nagpasiugda ug hatag niining inter-mirifica, unang module ubos sa programang “Media Baby Ka Ba?” kaniadtong February 2012. Kini napahigayon na sa daghang mga parokya sa arkidayosis sa Davao ug nagapadayon pa gihapon ang paghatag niini.