Blessing sa bag-ong Tabernacle gipahigayon

Si Hesus nga buhi sa Eukaristiya, nagpuyo sa usa ka tabernakulo.

Ang St. Mary of the Perpetual Rosary Parish, Buhangin, Davao City adunay 55 ka mga Gagmay’ng Kristohanong Katilingban (GKK). Ang GKK San Isidro Labrador, Ciudad de Esperanza maoy usa sa nahisakop niini nga parokya. Pagkabulahan gayud sa maong GKK tungod sa usa ka prebilihiyo nga gihatag sa Kura Paroko nga si Rev. Fr. Jesus H. Samaniego nga adunay Santos nga Misa nga saulogon kada Domingo pinaagi sa mga Pari sa Regional Major Seminary (REMASE), Catalunan Grande nga gipangulohan ni Msgr. Abel Apigo. Ika-upat na ka tuig karon sukad nga gisugdan ang Santos nga Misa niadtong Abril 07, 2013.

Tungod sa paningkamut sa mga GKK Servant Leaders (GSL) ug suporta sa mga miyembro sa katilingban sa San Isidro Labrador, Ciudad de Esperanza gipahigayon ang pag-blessing sa tabernacle nga dugay nang gihandum diha sa kapilya. Si Msgr. Abel Apigo, rector sa REMASE mao gayud ang naghimo’g rito sa pag-ampo o pag-blessing sa bag-o nga na install nga tabernacle. Kini nahitabo niadtong Agosto 13, 2017 sa 8 sa buntag atol sa Santos nga Misa. Malipayon gayud ang katilingban nga nakita diha sa atubangan ang kasagrado sa tabernacle diin gamit usab ang insenso. Ang solemnidad niini nga naghulagway sa Balaang Presensya sa Ginoo diha sa Yukaristiya, ang lawas ug dugo ni Kristo. Tungod niini ang mga GSL nga gipangulohan ni Maria Dexie Calvo mapasalamaton sa mga miyembrong manggihatagon nga nagpaambit sa ilang mga panalangin ug grasyang nadawat. (Arsenia Barimbao and Hermie Mapute, SMPR SoCCom)