Biktima sa Roxas Night Market bombing giampo

Ang mangilngil nga pagpamomba sa Roxas Night Market niadtong milabay nga tuig, gihandum niadtong Agosto 31.

Usa ka misa ang gipahigayun nga gipanguluhan ni Arsobispo Romulo G. Valles, D.D. kinsa mao ang Arsobispo sa Dabaw ingun man mao usab ang bag-ohay lamang nga giboto isip president sa Catholic Bishops’ Conference of the Philippines.

Human sa maong misa mihalad ug bulak ang mga survivor sa nahisgutang pagpamomba, ingun man opisyales sa Dakbayan nga giduyugan sa mga kabanay ug higala sa mga namatay sa maong insidente.

Sa maong okasyon, nanawagan si Mayor Inday Sara Duterte-Carpio sa publiko nga magbinantayon, mutabang sa kalinaw ug kung adunay mga namatikdan nga dautang indibidwal, kuyog ang ilang kadudahang lihok daling i-report sa otoridad arun dili na ma subli pa ang nahitabo kaniadto sa siyudad.

Gipasabot sa mayor nganong kagahapong adlawa ang paghandum sa panghitabo ug kung nganung dili ipahigayon sa Septyembre 2 atul sa tukmang adlaw sa insedente. Sumala niya nga nakasabot siya sa kabanay sa mga namatay nga muduaw sa lubnganan sa ilang mitaliwan na nga miyembro sa pamilya.

Si Maria Balili, usa sa survivor dako ang pasalamat sa lokal nga panggamhanan sa syudad tungod nagapadayon kini nga naga atiman kanila, sukad sa pagbutu sa bomba diin sila nangaangol. Matud niya nga anaa gayud sa ilang kiliran ang lokal nga panggamhanan sa syudad nga andam nga midunol sa ilang gikinahanglan.

“Salamat kayo sa Local Government of Davao sa ilang tabang, kang Mayor Sara, kang President Duterte nga wala mi pasagdi, dili nako ni makalimtan hangtud sa kahangturan,” butyag ni Balili.

Kahinumduman nga ang Roxas Avenue usa sa ma bibong dapit sa dakbayan sa Davao diin, mu duaw gayud ang mga Davaoeño lakip ang mga langyaw tungod anaa nag pasad sa kadalanan ang nagkadaiyang pagkaon ilabi na sa kagabhion. Apan, niadtung Setyembre 2, 2016, mibusikad ang usa ka bomba nga gikamatay sa 15 ka tao ug gikaangol sa 69 ka indibidwal.