“Akong bokasyon sa pagkapari tungod sa katekista” – Bishop Roberto C. Mallari

5th Mindanao Region Catechist’s Convention

“Viva Maria!” ang singgit sa tigpadasig niining 5th Mindanao Region Catechist’s Convention, usa ka dakung panagtigum nga nahitabo sa Digos City, diin mikabat sa sobra 300 ka mga partisipanteng Katekistas, gikan sa Archdiocese of Davao, Diocese of Digos, Mati, and Tagum (DADITAMA), Diocese of Kidapawan, Marbel, and Archdiocese of Cotabato (KIDMACO), Archdiocese of Cagayan de Oro, Diocese of Butuan, Surigao, Tandag and Malaybalay (CABUSTAM), Diocese of Dipolog, Iligan, Pagadian, and Prelature of St. Mary’s-Marawi, and Archdiocese of Ozamiz (DOPIM), Archdiocese of Zamboanga, Diocese of Ipil, Prelature of Isabela, and Apostolic Vicariate of Jolo (ZAMBASULI) uban sa ilang mga director nga mga pari ang miapil. Nahitabo kini sa tulo ka adlaw Septembre 18 ngadto sa 20, 2017. Ang tema nga nakahiusahan mao: “Catechists: Formators of Communion, Participation and Mission of Basic Ecclesial Communities.” Sa ingon pa ni Bishop Guillermo Afable, Bishop of Digos City ginapahitabo kini, “to revitalize missionary zeal as agents of communion of communities; to motivate mutual collaboration and participation as Mindanao church through sharing of experiences in the ministry of catechesis; and to celebrate with joy their vocation and mission as catechists.”

Sa unang adlaw, gidawat ang mga partisipante sa Director sa Kateketics sa Diocese sa Digos nga si Fr. Rico Dingal, sa ngalan sa Obispo nga si Most Rev. Guillermo Afable, D.D. Gisugdan ang programa, pinaagi sa pagpaila sa ilang Pinasidunggang Bisita nga mao ang Obispo sa San Jose Nueva Ecija nga si Most Rev. Roberto C. Mallari, D.D. Gisaysay ni Obispo Mallari, ang ka-epektibo sa role sa katekista sa iyang kinabuhi ug sa kinabuhi sa iyang Amahan nga mitaliwan na niadtong Julio ning tuiga. Matud pa niya, naabli ang iyang bokasyon sa pagkapari tungod sa usa ka katekista nga nagtudlo kanila unsa kamahinungdanon sa pari alang sa katilingban. Matud pa sa iyang katekista nga kon magpari sila (kay dinha man sila sa sulod sa klase) mahilangit gayud dayon ang inyong mga ginikanan. Sugod niadtong adlawa, gi-alimahan dayon siya sa iyang ginikanan nga matudloan siya sa mga kamatuoran mahitungod sa Dios. Gipadayon niya ang iyang pagpasabot sa tema nga mao ang “Katekista: Tig-umol, nga Mahiusa, Mo-partisipar ug Mohimo sa Misyon, diha sa Gagmayng Kristohanong Katilingban kon BEC.

Ang gihatagan sa dakung pagtagad sa Obispo Mallari, mao ang pagmugna sa kahiusahan. Unsaon kini pagpalampus? Matud pa niya: 1. Kinahanglan nga andam gayud ang matag usa sa pagbag-o. Diha sa pagbag-o, nagkinahanglan kita ug panabang, ilabi na sa atong Simbahan, sa atong mga pari, ug sa atong mga magtutudlo sa pagtuo. 2. Magtuon kita sa pagpahiusa sa nagkalainlaing pinulungan ug mga tribu aron mahimong bahandianon ang atong panglantaw sa pagtuo ug sa nagkadaiyang kalihukan, nga usa ra apan adunay lain-laing bulok sa pamaagi ug praktis. 3. Tinuod adunay kalainan apan naningkamut nga mahiusa aron ang Simbahan mabulukon. 4. Pagka-maandamon sa pagdala sa maayong balita ngadto sa uban, kay ang atong pagka-katekista dili aron kita ang magmabungahon kondili aron maluwas ang tanan. 5. Hinumdoman usab sa tanan nga ang atong buhat sa pagpatubo sa kahiusahan, dili buhat sa tawo o kanato kondili buhat sa Dios. Busa dili kita makapagarbo nga gikan kanato ang kahiusahan.

Sa ikaduha ka adlaw, Setyembre 19, Martes, nagsugod ang programa sa alas 9:00 sa buntag. Gisugdan kini sa mga awit ug pagpa-ugnat sa kusog. Human sa hamubong pag-ampo, gisugdan sa pagpaila sa ikaduhang tigpasabut sa dugang tema: “Misyon sa Katekista sa Mindanao Karon.” Ang ilang speaker mao si Sr. Stella Marie Llerin, OND. Matud pa niya, mibalik lamang kita karon sa orihinal nga diwa sa Vaticano II, nga mao ang gisulti ni Papa Juan XXIII “Pasudla ang Espiritu Santo sa Simbahang Katoliko”. Mao kana ang pagbag-o nga gihangyo kanato sa Simbahan Karon. Ang kabag-ohan nga dala sa Espiritu Santo mao ang tumong sa misyon sa katekista. Busa kinahanglan nga una: si Jesus ang sentro sa atong ipanudlo. Ikaduha: aron mahitabo kini, kinahanglan nga ang katekista molambo sa ilang pag-ila sa kaugalinon-self-knowledge. Ikatulo mao ang pagtubo nianang pasyon sa misyon sa Dios. Tungod kay kita mga instrumento man lamang. Ang Simbahan, namugna dili alang sa atong kaugalingon kondili alang sa misyon. Ikaupat ang matag katekista, mosalmot sa katilingban nga iyang gialagaran, ilailahon kon kinsa ang atong ikahimamat, aron mapaila nato si Jesus ngadto kanila. Unsaon pagsugod niini? Magsugod sila sa pagbasa sa mga timaan sa panahon. Basahon kini pinaagi sa mga mata sa Ebanghelyo. Nagkahulugan nga makig-ambit kita sa unsang mga panghitabo sa atong kalibutan karon. Tan-awon, pamalandongan, pamation, ablihan ang kaugalingon sa pagdawat kon naunsa ang katawhan ug dalhon ang gingharian ngadto kanila. Matud pa sa Simbahang Katoliko adunay upat ka mga pamaagi nga molampus kini: Una: Gikan sa mga naandang kalihukan ngadto sa pagdiyalogo. Ikaduha: Pagka-kinagaugalingon ngadto sa kolaborasyon; Ikatulo: Pagkamagarbohon sa atong mga kalihukan isip Simbahan ngadto sa pagkamapaubsanon, aron nga ang unang mabag-o mao ang kaugalingon ug unang makadawat sa grasya sa kabag-ohan. Ikalima: Ang sangon dili usa ka bug-at nga palas-onon kondili usa ka pribilihiyo o gasa.

Sa pagka-alas 10:30 sa buntag ang ikaduhang magsasangyaw mao si Mrs. Loreta O Juarez, usa ka Maestra Katekista sa Holy Cross College sa Davao City. Ang mga katekista. Naghisgot siya mahitungod sa dignidad sa mga katekista. Iyang gipalawom ang sulat sa atong Santo Papa Francisco nga nag-ingon: Catechist: are specialized worker, direct witnesses, indispensable evangelizer who represent basic strength of Christian Communities.” Busa ang mga katekista matud pa sa speaker: Nagkinahanglan nga mamahimong balaan. Unsa may timaan sa Spiritualidad sa mga katekista? Una: Abli sila sa Pulong sa Dios. Basa sa Balaang Kasulatan ug sa Katolikong Katesismo sa Simbahan ug sa mga Sulat Pastoral sa Mga Santo Papa. Ikaduha: Abli ang kasingkasing sa Dios. Duol sa mga Sakramento. Pag-ampo sa kanunay. Ikatulo: Abli ngadto sa Unsay gipanudlo sa Simbahan- ang buhing mga sakop diin atong nadawat ang sugo sa pagpanudlo, kay sila ang nagpadala kanato. Ikaupat: Abli usab sa Kalibutan… apan wala kita magpahisulod sa kalibutan. Ikalima: Matinud-anong Kinabuhi diha ni Cristo. Maingon nato nga malisod kaayo kining mga pagabuhaton, apan dili kini impossibly. Ang kinabuhi sap ag-ampo; kasinatian nato kang Cristo ug ang kamatinud-anon diha sa buhat o panabng sa Espiritu Santo. Ikaunom: Adunay kaikag ug kaisog isip tigdala sa misyon ngadto sa kaatwhan. Ikapito mao ang atong debosyon kang Maria. Si Maria nga atong Inahan, siya usab ang modelo sa mga katekista, kay siya ang naunang disipolo nga nadagdala kang Jesus nagdto sa katawhan. Siya ang Rayna sa mga Apostoles nga mao ang unang magsasangyaw mahitungod kang Cristo sa tibuok kalibutan.

Ang Ikatulong tigpamulong mao si Ms. Hiyasmin Campus nga nagpasabut sa tema: “BEC: Agents of Communities in the Parish,” gikan sa PCPII-gipasabut kon unsa ang BEC. Ang BEC mao ang tigpasiugda sa parokya, diin nagsugod diha ang panagtag-bo aron magkasuod sa usag-usa. Adunay regular nga panag-tagbo tungod sa pag-inambitay sa Pulong sa Dios. Diha usab sa sulod sa BEC, adunay panag-inambitay sa ilang mga unsay anaa kanila o mga resources ug ang pagkahiusa nga sila mag-ampo, mangalagad ug magsangyaw nga mao ang tubag sa gasa sa ilang pag-ambit sa pagkapari ni Jesus, pagka-alagad ni Jesus ug sa pagkamagsasangyaw ni Jesus. Pagkapari, Pagkaprofeta ug Pagkahari. Adunay nakita nga mga negatibo “Culture of Isolation” sa kalibutan ug katawhan karon nga mao: 1. Makaugalingnon o pag-iniyahay, ug pagsalikway. Kining mga negatibong kahimtang mahimong matubag pinaagi sa pagpakusog sa atong hiyas sa pagka-mabation o pagtagad sa usag-usa bisan dili kaila o pareho ug pinulungan or welcoming. Pakusgan usab ang pagkama-abi-abihon sa mga sakop sa BEC o sa mga katekista. Ug ang katapusan mao ang Paghiuliay sa usag-usa pinaagi sa Gugma.

Interview kang Sr. Genevieve Damaso, OND
Unsa ang importansya sa katekista sa simbahan?
“Ang katekista labing importante sa simbahan tungod kay siya maoy gipili ug gipadala ni Jesus aron ipaila-ila, ang Ginoong Jesukristo ngadto sa bata ug ngadto sa Amahan ug Espiritu Santo.”

Nakatabang ba kining MRCC isip katekista? Sa unsang paagi?
“Ang MRCC dakong tabang sa pagpalalom sa Misyon sa us aka katekista, ang pagkamahinungdanon sa iyang papel sa pagsangyaw sa Maayong Balita sa konteksto niing kalibutan nato karon.”

Unsa imong nakat-onan niining panagtapok?
“Ang mas lalom ng pagsabot sa Misyon sa Diyos isip Misyon sa Simbahan, Misyon usab sa Katekista. Ang importansya sa paglambigitay o pag-apil-apil sa pagtuman sa Misyon sa Simbahan aron makab-ot ang kahiusahan.”

Isip host/organizer, unsay hagit ninyo sa pagpatuman niini?
“Ang pagpangita ug resources (pinansyal) aron madefray ang expenses sa pagkaon, travel ug honorarium expenses sa mga speakers, apan kining tanan nasulbad kay nagtinabangay ang among mga GKK ug mga parokya dinhi sa Digos labi na ang Mary Mediatrix Cathedral ug San Isidro, Labrador Parish.” (Sr. Rica Dalaguit, fsp)