Sakop ako dinhi

Ika-20 nga Domingo sa Ordinaryong Panahon
Is 56:1,6-7/ Ps 67/ Rom 11:13-15, 29-32/ Mt 15:21-28

Karong Domingoha maghisgot mahitungod sa usa ka babaye nga taga-Canaan, usa ka pagano, kay dili man siya sakop sa banay sa Israel, ilabi na sa pag-ingon ni Jesus nga Siya mianhi alang lamang sa mga sakop sa banay sa Israel. Ug nag-unsa man kining bayhana dinhi sa among lugar? Tungod sa iyang pagtoo, ania siya aron mamaayo ang iyang anak nga babaye nga niining tungura dakong grabe sa sakit.

Ang iyang pagtoo ug pagsalig kang Jesus wala gayud mokutap, bisan sa giingon ni Jesus nga dili angayan nga ihatag ang mga pagkaon sa mga bata ngadto sa mga iro (meaning Gentiles). Apan ang iyang tubag kang Jesus nga bisan gania ng mga iro mokaon usab sa mga pagkaon gikan sa mga bata nga nahulog gikan sa ilang mga lamisa. Kini nakapasabot ni Jesus tungod sa lawum nga pagtoo sa babaye. Ang maong Pagtoo sa babaye ngadto sa Diyos maoy napakasakop kaniya sa banay sa Israel.

Sa atong bahin usab mga kaigsoonan, dili gayud kita makaingon nga dili kita sakop sa banay ni Jesus. Bisan tuod gagmay pa kita gibunyagan, ang pagtuo sa atong mga ginikanan ug mga ninong ug ninang maoy nakapasagop nato sa Simbahan. Bisan taliwala sa atong pagkulang sa kahingpitan gumikan sa atong pagkamakasasala, ang Diyos kanunay nagtawag kanato sa pagduol ngadto Kaniya aron pinaagi sa Sakramento sa Pakig-uli kita usab magmahingpiton.

Ang Simbahan Katoliko. Ang pulong KATOLIKO nagakahulogan nga malukpanon (universal). Tanang binunyagan sa tibuok kalibutan sakop gayud sa Simbahan. Ang Simbahan dili alang lamang sa mga puti, mga itum, mga brown, o alang lamang sa taga-Asia, O America, o sa Europa, o Australia, o sa diin man gikan nga tawo. Atong timan-an kini: ang tanang binunyagan sakop gayud sa Simbahan. Bisan kadtong mga pagano nga adunay tinguha nga magpabunyag (baptism by desire), sila usab sakop sa Simbahan.

Kitang tanan mga masakiton ug makasasala. Busa kita nagkinahanglan nga ayohon ni Jesus. Sama sa babaye nga miduol kang Jesus, tungod sa iyang tinguha nga mamaayo ang iyang anak. Nan kita usab muduol kang Jesus pinaagi sa Simbahan sa higayon nga kita mosimba matag adlaw o matag domingo aron kita hatagan sa Dios sa kabaskog sa kinabuhi, kay si Jesus miingon nga “Kinsa kadtong gikapuyan, duol kamo kanako kay papahulayon ko kamo” (Matt. 11:28). Ang tanan iyang gitawag ug giimbitahan.

Bantayan nato kanunay nga ang dakong tentasyon nga ipresentar kanato sa yawa mao nga kita dili angayan pagdawat sa grasya sa Dios. Gusto sa yawa nga atong isalikway usab ang atong kaugalingon ug dili siya gusto nga muduol sa Dios. Atong timan-an kini: Mao man gani nga mosimba kita sa matag Domingo ubos sa simple ug mapaubsanong pagtoo. Sama sa babaye nga taga-Canaan, atong pangayoon sa Dios nga kita iyang ayohon sa mga balatian, ilabi na nga mosalig gayud kita Kaniya, kaya ng Dios puno sa kalooy ug kapuangod. Taliwala sa atong pagkamakakasala, atong lantawon si Jesus sa Krus ug pamalandongan ang iyang pagluwas kanato. Sa dakong mapaubsanon nga kasingkasing, kita moingon ngadto kaniya: Ginoo, sakop ako sa simbahan. Amen. (Msgr. Bonifacio Burlaza)