Obispo midayeg sa gobyerno sa libreng tuition

MANILA — Ang simbahang Katoliko midayeg sa bag-ong pamalaod nga Republic Act 10931 kun “Universal Access to Quality Tertiary Education Act”, nga nagtugot sa libreng tuition fee sa mga state college ug universities.

Si Balanga, Bataan Bishop Ruperto Santos, Pangulo sa CBCP’s migrants ministry, miingon nga daghang mga nanglangyaw sa ubang nasud aron ma sustentuhan ang pag skwela sa ilang mga anak og matubag ang panginahanglan sa ilang pamilya. Usa kini ka gasa matud pa niya, “hilabi na sa mga pobreng pamilya nga nanarbaho sa abroad kun Overseas Filipino Workers (OFWs) nga miagwanta nga mobiya sa ilang tagsa-tagsang pamilya aron makalingkawas sa kapit-os.”

Saysay sa Obispo nga “kining libreng tuition fee sa mga kolehiyo og mga unibersidad dakung tabang sa OFWs.”

Niadtong Agosto 3, 2017 gipirmahan ni Presidente Rodrigo Duterte ang balaod nga mag hatag og libreng tuition fee sa tanang estudyante sa state colleges ug state universities sa nasud Pilipinas. (Dan Albarracin | HCDC intern)