Mahilangit ba kaha kita?

Mahilangit ba kaha kita?

Pangutana kini sa atong Arsobispo Romulo G.Valles D.D diha sa iyang homiliya sa kapistahan sa pagsaka sa atong Mahal nga Inahan ngadto sa langit. Agosto 15 karong tuiga, gisaulog sa Our Lady of the Assumption Parish ang ilang ika-58 nga parochial fiesta ug foundation anniversary.

Ang kapistahan sa Assumption, matud pa niya, ginasaulog sa tibuok simbahan nga “malaumon, madaugon, very joyful, very hopeful, very victorious tungod kay ang diwa sa atong pagsaulog diwa sab sa paglaum diha sa gahum ni Kristo nga maoy gianak sa Mahal nga Birhen.”

Dugang niya nga,”ang pagkabanhaw ni Kristo mao ang sinugdanan sa tanan,” tungod kay ang iyang pagkabanhaw, naghatag ug paglaum sa tanang nangamatay. Sa kadaugan ni Kristo, “ang Mahal nga Birhen maoy unang nakadawat ug nakatilaw sa maong kadaogan.”

Ang kamatayon kuno ang pinakapait nga kapildihan, apan ang Mahal nga Birhen naghatag kanato ug inspirasyon kung muabot man ang atong kamatayon. Siya naghatag kanato ug paglaum nga ang atong padulngan mao ang kalipay nga walay katapusan sa langit.

Apan, ang iyang dakong pangutana, “mahilangit ba kaha kita?” Sa unang pagbasa gikan sa Gipadayag, adunay usa ka babaye nga nagsabak, ug adunay usa ka ‘dragon’ nga gusto musakmit sa bata apan gikuha sa Diyos ang babaye, ug iyang gidala sa lugar nga layo sa ‘dragon’.

Iyang gihambin nga kining ‘dragon,’ “dragon sa ambisyon, dragon sa drug addiction, dragon sa tawhanong kaibog ug uban pa.” Aduna usab kunoy “andam musakmit sa atong gihuptan nga pagtuo kang Hesukristo” dinhi sa atong kinabuhi. Apan, sa unang pagbasa gihatagan kita ug mensahe nga dili mahadlok ilabina kung magpahiduol kita sa Ginoo, kay siya anaa sa atong taliwala.

“Dili kita biyaan sa Diyos,” padayon niya, kay kung tan-awon nato ang kinabuhi sa atong Mahal nga Birhen, luyo sa iyang kasakit, paglutos sa iyang pagtuo, mga ‘dragons’ sa iyang kinabuhi, siya nagpabilin nga masinugtanon ug matuohon. Ang kinabuhi ni Maria, usa ka dakong pagpakita kung unsa ang mahitabo sa usa ka dakong pagtoo Diyos, ug dakong gugma sa Diyos sa tawo, ug usa niini mao ang pagkayab nato sa langit sama ni Maria.

Apan niingon siya, “unsaon kaha nato pagtan-aw sa presensya sa Ginoo sa atong kinabuhi sama ni Maria? diin kini makita lamang pinaagi sa mga mata sa pagtuo kon “eyes of faith”?

Sama ni Maria, kung kita adunay kasingkasing nga mutabang sa uban, atong masinati ang Ginoo kay matud pa sa atong Arsobispo, “mabati nato ang Ginoo diha sa atong pagpangalagad ngadto sa uban.”

Iyang gitapos ang wali sa pag-ingon, “kitang mga Pilipino giingon nga, ‘El Pueblo Amante de Maria,’ a people in love with Mary. What a beautiful gift! Kining giingon nila nga our faith has a very strong Marian color tungod kay ang nahitabo kang Maria, kining devotions nga nadevelop sa simbahan alang kang Maria, kining tanan mga igsoon, I have no doubt, kanunay magadala kanato kang Hesus ug diha kang Hesus magdala kanato ngadto sa kinabuhi nga walay katapusan. Mga igsoon happy fiesta! Viva Maria! Viva!”