Livelihood program, sulbad sa kapobrehon

21 ka miyembro sa nagkalain-laing Gagmay’ng Kristohanong Katilingban (GKK) ang nisalmot sa gipatigayon nga bread and pastry production sa Sto. Rosario Parish, Toril. Gisugdan kini niadtong April 29 ug mahuman karong August 12, 2017. Kada sabado ang maong klase nga ginahimo sa Sto. Rosario Parish formation center.

Kini gipatigayon aron masulbad ang problema sa kapobrehon, matud pa ni Ernesto Basmayor, Parish Social Action Ministry Coordinator ug in-charge sa trainings ug livelihood program sa parokya. “Ang tao nga walay trabaho di jud na makahatag pero kung tudloan nimo sa pagtrabaho, kung unsa man ang resulta sa iyang pagtudlo nga makatrabaho siya, makahatag na na,” dugang ni Fr. Roy Mejias, kura paroko sa Sto. Rosario Parish of Toril.

Daghan ang nagmalipayon sa pagtuon sama ni Kathleen, nga bisan luyo sa iyang hearing impairment siya naningkamot makatuon sa maong programa kay sumala pa ni Delton Teric, karaang Pangulo sa Batan-on sa GKK San Isidro Labrador, Catigan, usa kini ka oportunidad nga makabaton ug certificate sa bread and pastry NCII.

Samot nagpasalamaton ang mga parokyano tungod sa paghatag ug libreng serbisyo sa trainor sa maong aktibidad. Sumala sa maong trainor nga si Theresa Rozaldo, “to reach the grassroots is one of the objectives of this service.” (Juneva Ardopella | SRP SoCCom)