Inter Mirifica ug 25 Para sa Radyo gilusad sa Buhangin

Gisalmutan sa 111 ka mga GKK SoCCom ug uban pang GKK Servant Leaders sa nagkalain-laing ministriya ang seminar mahitungod sa Social Communication nga mao ang “Inter Mirifica” sa St. Mary of the Perpetual Rosary Parish niadtong Hulyo 30.

Nagsugod ang pagrehistro alas 9:00 sa buntag ug ang seminar proper alas 10:00 sa buntag. Didto kini gipahigayon sa Shrine of Our Lady of the Most Holy Rosary.

Ang Topic #1: “The Power of Social Communication and Mass Media” gihatag ni Sis. Hermie Mapute, SoCCom coordinator sa parokya. Gisundan kini sa Topic #2 nga gihatag niining manunulat, Bro. Naldz Villodres mahitungod sa dokumento sa Vaticano II nga gititulohan ug “Inter Mirifica.” Dinhi gibatbat ang ensaktong paggamit sa himan sa komunikasyon o midya aron pagsabwag sa Maayong Balita.

Dugang pang gihisgutan ug unsaon pagsuporta sa midya sa Artsidiyosesis sa Dabaw nga mao ang Davao Catholic Herald newspaper ug ang atong nag-inusarang katolikong sibyahanan – DXGN 89.9 Spirit FM.

Tungod niini, gilusad ngadto sa 55 ka mga GKK nga sakop sa parokya sa St. Mary ang “25ȼ Para sa Radyo Ko.” Gipasabot ni Dr. Cheryl Vilog, ang Research and Training Head sa Davao Verbum Dei Media Foundation, Inc. nga gisugdan ang proyekto sa mga estudyante sa University of Immaculate Conception (UIC) niadtong tuig 2015. Pinaagi sa suporta sa RVM sisters.

Matud pa, nga kon ang tanan magtinabangay ug magkahiusa, dako kaayo kining suporta alang sa pinansiyal nga panginahanglan sa atong nag-inusarang Katolikong mantalaan ug radyo sa Dabaw.

Ang Inter Mirifica ikanaug na sa mga GKK sa Buhangin duyog sa GKK pre-fiesta orientation. (Naldz C. Villodres, SMPRP SoCCom | Photos: Norie Santillan)