HIV-AIDS awareness seminar gipahigayon sa Agdao

Mga partisipante sa HIV awareness nagdula ug Hephep Hurray.

“Walay pili ang edad sa pwede magka-AIDS.”

“Pwedeng matakdan bisan ang newly-born sa HIV.”

Una pormal nga gisugdan ang HIV_AIDS Awareness Seminar nagdula usa og hephep hurray ang mga partisepante. Sa matag sayop nga lihok, motubag sila sa pangutana ug kon sayop na pud ilang tubag, mahibaloan nila ang sakto nga tanan mahitungod sa HIV-AIDS. Kini nahimong pasiunang impormasyon sa maong seminar.

Ug tungod niin, abaw ang mga GSL sa San Antonio de Padua, sa Agdao, sa padayon sa paglingkod aron maminaw sa tibuok seminar sa HIV AIDS Awareness niadtong Agosto 20 sa St. Mary’s Hall, sa buntag.

Nganong kinahanglan makisayod ug mahibalo ang katawhan mahitungod sa HIV ug AIDS?
Ang Philippine Catholic HIV-AIDS Network o PHILCHAN gimugna sa Simbahan pinaagi sa Catholic Bishops Conference of the Philippines niadtong dos mil otso didto sa Manila. Kini mikaylap sa Visayas ug Mindanao. Pinaagi sa ilang team diri sa Mindanao ilabi na ni Nelia Rota, clinicl instructor sa College of Nursing sa Ateneo de Davao University, gipaambit nila ang mga impormasyon ug statistics nga naka-abre sa hunahuna ug pagbati sa mga parokyano sa kabililhon sa kahibalo aron matabangan ang katawhan sa paglikay sa maong makalilisang nga sakit.

Adunay 41,700 nga kaso sa HIV karong tuiga ug sa kasamtangan adunay 2,600 nga bag-ong kaso niini diri sa Davao, nga layo ra kaayo sa natala nga 42 nga bag-ong kaso niadtong Agosto 2016.

Sa datos niadtong Abril 2017. kadaghanan sa natakdan sa HIV gikan sa 25-34 nga pangedaron ug mihimo sa lalaki sa lalaki nga pakighilawas. Diha sa matag rehiyon nga tala, ang Davao ang ika-lima sa pinaka-daghan nga kaso ug ang nasud Pilipinas ang adunay pinaka-taas nga pag- usbaw sa bag-ong HIV infections sa Asia-Pacific region nga adunay 141% increase.

Giunsa pagbalhin sa HIV infection gikan sa usa ka tawo ngadto sa laing tawo?
Ang pagbalhin mamahimong pinaagi sa pakighilawas sa usa ka HIV infected person o PLHIV, sa pagpanganak ug pasuso sa bag-ong himugso nga bata (apan dili sa tanang higayon), sa blood ug mga blood products (blood transfusion ug organ transplants), ug diha sa pagpasa-pasa sa needle, syringes, ug ubang injecting equipment, apil ang gamit sa tattoing, nga dili “sterile”. “Blood is enough to infect”, sigon ni Ms. Rota.

Unsa ang duga sa lawas nga mamahimong magdala sa HIV infection gikan sa usa ka tawo ngadto sa lain?
Kini mao ang dugo, duga gikan sa kinatawo sa lalaki, duga gikan sa kinatawo sa babaye, ug ang gatas sa inahan.

“Once you have HIV, you have it for life.”

Unsa ang buhaton aron makalikay niini?
Ang PHILCHAN miingon na mag: A- Abstinence (ayoko muna), B- Be mutually faithful (Basta Ikaw Lang at Ako), C- Conscience and Correct Choice, D- Don’t Use Drugs (Droga ay Iwasan), E- Educate (Edukasyon ay Kailangan).

Adunay mga testing sites diri sa siyudad sa Davao nga maadtoan: sa SPMC, RHWC (Reproductive Health and Welfare Center, Magsaysay Park), community centers, City Health, ug sa district health centers, ug kon mo-positibo sa HIV infection, moadtyo sa SPMC treatment hub sa Mindanao nga makahatag usab sa dugang nga kasayuran.

Ang PLHIV giprotektahan sa Republic Act 8504 kung diin ang ilang katungod sa pagpanarbaho gisuro apil na ang ilang confidentiality, ang desente nga paglubong, ug uban pa.

Simabahanon ang pag-alagad sa PHILCHAN. Sila nagahatag dili lang sa materyal nga pagtabang kundili nagahatag usab sila sa psycho-social nga suporta ug labaw sa tanan ang espirituhanong pakig-uban kanila aron mgpadayon sila sa pagpuyo nga malaumon sa pagtoo, sa gugma, ug sa kalooy sa Dios.

“Dili ang iyang pagkatawo ang magdala kaniya sa risgo sa HIV kundili unsa ang iyang gibuhat.” (Elena Mozo | SADPP SoCCom)