Happy Fiesta Assumption Parish: Si Birhen Maria ang mangaliya

Ania usab kita sa panahon sa pagsaulog sa kapistahan sa atong mahal nga Patron: OUR LADY OF THE ASSUMPTION.

Usa ka maanindot nga panahon sa pagpamalandong ug pagsaulog sa atong kapistahan sulod niining Tuig sa Parokya subay sa tema: “Parish as a Communion of Communities.”

Kita gidasig sa pagdangop sa atong Langitnong Inahan diha sa atong pagpaningkamot sa pagkab-ot sa tumong sa atong Simbahan sa pagpalig-on ug pagpalambo sa kahiusahan sa atong Parokya.

Busa, ang tema sa kasaulugan sa atong Kapistahan niining tuig 2017 mao ang: “UBAN SA PANGALIYA NI MARIA, MAGHIUSA KITA SA PAGPATUNHAY SA ATONG PAROKYA.”

Gani, ang maong kapistahan nagmabungahon ug nahuman ra gayud, apan ang mensahe sa mga aktibidad nga gibuhat sama sa Novena ug Pontifical mass, Sacrament of Confirmation, Holy Rosary, Flower Offering, Vigil Mass of the Assumption, Fiesta Fellowship, Baptism, Candle Procession (in honor of Our Lady of the Assumption), Youth Night, ug Sagop Kinabuhi Program II Symposium, ug sa umaabot nga adlaw, Cultural Night ug Marian Quiz Culmination, nagpabilin sa among kasingkasing.

Tinuod gayod nga gikinahanglan nato ang pangaliya sa atong Inahan nga hatagan kita sa grasya sa atong Langitnong Amahan aron ang tinuod nga kahiusahan o komunyon sa mga katilingban mapatuman.

Usa ka masimbahon, masaksihon, nagasangyaw ug maalagaro’ng katilingban. Pinaagi sa ehemplo sa Mahal nga Birheng Maria nga puno sa kaalam ug gugma, unta ang atong mga kaparian, relihiyoso ug laykong mga pangulo ug tanang lumilihok diha sa parokya makabaton sa maong mga hiyas diha sa ilang paggiya sa katawhan sa Dios. Maingon usab atong hangyoon ang atong Inahan na panalanginan sa Dios ang tanang mga parokyano nga miyembro sa parokya ug sa mga GKKs, diha sa ilang paghalad sa ilang panahon, talento ug bahandi isip piniyalan sa mga grasya nga gigasa gikan sa Dios alang sa pagtukod ug pagpalambo sa Simbahan. Sa giingon sa anghel kang Maria: “Maghimaya ka! Napuno ka sa grasya!” Sa tiunay gayud mituo kita nga puno sa gasa sa Espiritu Santo si Maria sugod paman sa sinugdan sa pagpanamkon kaniya hangtud sa iyang pag-ambit sa misyon sa atong Ginoong Hesukristo. Busa mangaliyupo kita kaniya nga unta ang Espiritu Santo maglamdag, magdasig ug mag lig-on kanato diha sa atong aktibong pag-apil sa misyon nga gitugyan kanato diha sa parokya. Ang maong Espiritu magpadayon unta nga magdasig kanato nga mamahimo kitang usa ka katilingban nga kanunay anaa ang pagpama-landong, nagabasa sa mga tilimad-on sa panahon ug nagahubad niini sumala sa kahayag sa Ebanghelyo ilabina gayod sa mga panghitabo sa kalibutan, sa atong nasud, partikular dinhi sa Mindanao karon.

Usa ka dakong hagit kanatong mga sumusunod ni Kristo ug mga tumutuong mga anak sa Birheng Maria nga mamahimo kitang patubo diha sa atong sosyodad pinaagi sa pagpatuhop sa Ebanghelyo diha sa tanang hut ong sa atong katilingban ug aron sa pagpahan-ay niini subay sa mga mithi sa Gingharian sa Dios: gugma, kalipay, kalinaw, hustisya. Busa kitang tanan mangilaba sa atong inahan:

“O mahal namong Inahan nga gipayakab ngadto sa kalangitan, ikaw nga karon nga nagalingkod nga Reyna sa langit ug yuta, i-ampo mo kami ngadto sa Amahan ug sa imong Bugtong nga Anak, nga ang grasya ug diwa sa pagtina-bangay ug pagdawat sa kaakohan sa matag-usa magdala unta kanamo ngadto sa mas halapad ug mabungahon’g kahiusahan aron among mapatunhay ang tinood nga Kristohanong kinabuhi sa among mga GKKs ug sa among mga parokya. Amen.” Viva Birhen Maria!