Fatima sa Portugal mibisita pag-usab sa OLLP sa Bangkal

“Salamat, Mama Mary!” mao kini ang sampit sa usa ka Parish Pastoral Council leader sa dihang nakita niya ang imahe sa Our Lady of Fatima sulod sa simbahan sa Our Lady of Lourdes Parish sa Bangkal. Ang pagbisita pag-usab sa OLLP sa imahe sa Our Lady of Fatima niadtong Agosto 13 gitawag nga “13th Day Fatima Apparition Centenary,” ug daku ang kalipay sa mga parokyano sa iyang ikaduhang pagbisita.

Ikaduha, tungod kay niadtong Pebrero 6 niining tuiga lamang niabot sa parokya ang imahe sa Our Lady of Fatima gikan sa Portugal sa panahon sa nobena sa kapistahan sa Our Lady of Lourdes Parish. Kini na ang ikaupat nga pagsaulog sa artsidiyosesis sa Dabaw alang sa binulan nga paghatag niya ug dungog. Matag bulan gikan niadtong Mayo 13 karong tuiga, ginasaulog ang “The 13th Day.” Kini giorganisa sa mga Marian devotees sa Davao alang sa ika-100th year nga pagpakita niya kaniadtong 1917 sa Fatima, Portugal. Gisaulog ang misa sa buntag, pag-ampo sa konsekrasyon sa iyang putling kasingkasing, ug paghatag kaniyag mga rosas, ang mga deboto sa imahe nihatag sa ilang mga pangaliya kaniya.

Gani gamayn’g trivia, Agosto 13 pud sa buntag usab tuig 1917 nahitabo ang pagkidnap sa usa ka Administrator sa Distrito sa Vila Nova de Ourem sa tulo ka mga bata, Lucia, Jacinta ug Francisco, aron pagsulti sa “kamatuoran,” apan ang mga bata mibarog gayud sa ilang pagtuo kang Maria, ang Birhen sa Fatima. (Vonz M. Hijada | SoCCom OLLP)