Espirituhanong Gasa ni San Pedro (The Charism of Peter)

Is 22:19-23; Ps 138:1-2, 2-3, 6, 8; Rom 11:33-36; Mt 16:13-20

Karong dominggoha maghisgot mahitungod sa espirituhanong gasa ni San Pedro. Unsay buot ipasabot niining gasa? Diha sa atong mga kasinatian ug madungog nga adunay daghan mga tawo nga moingon nga adunay lugar nga atong mabatyagan ang presensya sa mga tawo nga nagpailawum niini. Sama pananglit diha sa museum nga atong mabatyagan ang mga presensya sa mga bantugang tawo sama ni Rizal, Bonifacio, Mabini ug uban pa.

Diha usab sa simbahan, parokya o shrine atong mabatyagan ang espiritwal nga presensya sa patron. Dili lamang sa lugar kondili sa mga tawo usab, sama ni Sta. Teresa sa Calcutta ug sama ni Pope St. John Paul II ug uban pa. Kini sila nagasidlak sa ilang pagka-maantuson. Si Pope St. John Paull II nagasidlak sa buhing misyon sa simbahan. Si Sta. Teresa sa Calcutta nagasidlak usab sa gugma ni Kristo ngadto sa mga kabus ug timawa.

Ang maong pagpadayag sa kahayag sa Dios ngadto sa maong tawo tungod kay siya nakadawat ma’g espirituhanong gasa nga atong tawgon nga karisma. Ang karisma maoy usa ka gasa sa Dios nga iyang gihatag ngadto sa simbahan alang sa kalibutan. Ang Dios maoy tubaran sa tanang karisma. Ang tawo nga nakadawat sa maong karisma, iyang gidawat alang sa kalibutan.

Si Pedro nakadawat sa maong karisma. Iyang nadawat kini kay siya man ang ulo sa simbahan, kay siya usab maong unang nagwali. Iyang gidawat ang pagpangulo sa simbahan sa adlaw sa pentecostes. Siya maoy unang nakadawat sa Espiritu Santo uban sa mahal nga Birheng Maria ug sa iyang kaubanang mga tinun-an.

Nan, unsa may kahulogan sa karisma diha sa atong kinabuhi karon? Kini nagkahulogan nga ang karisma ni San Pedro nagpadayon diha sa Simbahang Katoliko. Ang maong pagpangulo niya atong masinati diha sa pagpanudlo sa Santo Papa ug sa mga pagtulun-ang gamhanan sa Simbahan, nga gitawag ug Magisterium. Ang gahum nga nadawat si San Pedro didto sa Caesarea Philippi nagpadayon kini diha sa mga panudlo sa mga Santo Papa hangtud karon.

Salamat sa pagtoo ni San Pedro, kay tungod niya atong gibahandi ang mga sakramento sama sa Santa Eukaristiya, ang pagkaon nato sa atong panaw paingon sa langit, ug sa ubang mga sakramento aron hatagan ug kahulugan ang atong kinabuhi gikan sa pagkatawo, sa naglakaw nga panahon, ug sa dayon natong panaw balik sa Dios nga mao ang tuburan sa tanan.