Acupressure training alang PSA gipahigayon

Ang kinaunhang Acupressure Training o inato nga paghilot gipahigayon sa mga Pangulo sa Alagad (PSA) sa San Roque Parish – Malabog una nahuman ang bulan sa Hulyo.

Kini gipangunahan ni Sr. Cora R. Torollo, MC sa Missionaries of the Assumption agi ug pagtugot sa Kura Paroko Fr. Jemasol Ortiz.

Matud pa ni Sr. Cora, usa sa mga tumong sa maong training mao ang makakat-on ang mga PSA kon unsaon paghilot kay pinaagi niini, ilang ma-aplay ang ilang nakat-onan sa kaugalingon, matudlo sa uban ang ilang natun-an ug matagaan ug bisag gamay’ng alibyo ang mga naga-antos sa ilang balatian.

Gihatag ang maong training sa usa ka professional acupressure trainer nga si Relwin G. Dordas. Siya nalipay nga adunay daghang PSA nga migahin sa ilang panahon nga makakat-on unsaon paghilot. Ingon niya, “kini makatabang sa mga balatian sa tawo pinaagi sa pagsusi kon unsa ang gibating sakit ug ang pagtambal niini.”

Usa ka myembro sa PSA si Merlyn V. Man-on miingon nga daghan gyud nakat-onan sama sa dili paghilot kung adunay gibati ang tawo daan nga bug-at, dili paghilot inig adunay mens, mga maayong posisyon sa paghilot aron paglikay sa malisyoso nga binuhatan, pagtudlo sa mga different points nga angay hiloton ug daghan pa gayud.

Sa mao training mas na-awhag ang mga PSA nga mag organisa ug trainings niini tungod kay makatabang kini sa katawhan. (Imelda Overiz | SRPM SoCCom)