Mga seminarista: Alagad sa Simbahan, Alagad sa Kahiusahan

Mao kini ang tema sa malampusong instalasyon sa sagradong ministriya sa mga seminarista sa St. Francis Xavier Regional Major Seminary (REMASE). Gihimo ang investiture sa San Pedro Cathedral niadtong Sabado, Hulyo 1.

Ang misa gisaulog sa amahan sa Arkidayosis sa Davao, Arsobispo Romulo G. Valles. Matud niya, ang pagsul-ob sa sotana, ang ministeryo sa pagka lector (magbabasa) ug ministeryo sa acoletate (akoleto) “mga gagmay’ng ministeryo sa dili pa sila pari.” Gihagit niya sila nga magmatinud-anon sa ilang pormasyun ngadto sa pagkapari. “Privileged kita nga ania ang seminaryo sa Mindanao kay sa development sa history, magulang ang Davao nianang area mao nang nagtukod si Bishop Clovis Thibault, PME ug seminaryo,” pagpasabot sa Obispo sa kahalangdon sa presensya sa REMASE.

Dise sais (16) ka seminarista sa Pre-Theology sa REMASE nga wala pa nabendisyunan ang nagsul-ob sa sotana. Pito gikan sa Davao, lima gikan sa Tagum ug upat gikan sa Cotabato. Kining pagsul-ob sa puting sapot nagtimaan sa pagkatakos sa ilang tinguha sa pagtugyan sa ilang kaugalingon diha sa pag alagad sa Ginoo ug sa iyang simbahan.

Trayntay nuebe (39) ka Theology 1 seminarians ang gipadala isip mga ministro sa Pulong sa Diyos (ministry of lectorate) kon mambabasa. Katungdanan nila, sumala pa sa rito, nga mutabang sa tahas sa pagbasa taliwala sa Kristohanang katilingban. Gihatagan sila ug katungdanan sa pagsangyaw sa matag panagtigum alang sa liturhiya ug ipasabot ang pagtoong Katoliko sa kabataan ug mga hamtong isip pagpangandam sa pagdawat sa sakramento. Ang matag usa nakadawat ug bibliya gikan sa arsobispo.

Baynte dos (22) ka Theology 2 seminarians ang gipadala isip mga ministro sa akoleto. Sila mutabang sa mga pari ug diyakono sa pagpakalawat hilabi na sa mga masakiton. Ang matag usa gibendisyunan aron magpakabuhi sa hingpit sama sa paghalad sa kaugalingon kang Kristo matag adlaw.

Silang mga gi instalar gikan sa mga simbahan sa Zamboanga, Cagayan de Oro, Davao, Cotabato, Ozamis, Tagum, Butuan, Dipolog, Malaybalay, Tandag, Marbel, Kidapawan, Mati ug Ipil.

Misaksi sa maong okasyon ang pamilya sa mga seminarista, mga magtutudlo sa REMASE ug St. Francis Xavier College Seminary, nagkadaiyang kongregasyon, mga kaubanan sa seminaryo, ug mga layko.

Sumala sa Pre-Theology seminarian Peter Paul Misperos, ang kalipay ang nagpatigbabaw sa iyang gibati tungod sumala pa isip usa ka seminarista nakalampos na siya sa usa ka ang-ang sa pagkapari.

“Naay happiness. Makita nako ang hinay hinay nga fulfillment. Isip seminarista hinay hinay nga nakab-ot ang ang-ang ngadto sa pagkapari, ilabi na nga kini akong bokasyun gikan pani sa akong pagkabata,” gusto najud ko magpari, dugang ni Misperos.

Nanghinaot ang mga seminarista nga mutabang sa pag-ampo ang katawhan sa ilang gipiling bokasyun, aron sa kaugmaon muabut ang panahon, sa ilang gipangandoy nga ordinasyon.

Nasayran nga ang mga seminarista nga nagtungha sa REMASE mikabat na sa 150.

Ang pormasyon sa pagkapari sa REMASE gisugdan niadtong 1953 ni Fr. Louis Charles Sabourin.

Lantawa ang special live coverage niini sa DXGN 89.9 Spirit FM-Davao Facebook page.

(Photos by Brenda Milan | Anj Monton)