Mati diocese gipahingusgan ang aksyon batok droga

Mga parokya sa diyosesis sa Mati ang nagkahiusa sa pagtabang pagsumpo sa problema sa droga og mga bisyo, labi na sa kabataan. Kini ang gibutyag ni Apostolic Administrator Msgr. Edito S. Baño sa iyang pag-atubang sa media sa miaging semana ug sa pagtapok sa kaparian alang sa ilang binulan nga Presbyterium niadtong Hulyo 18, 2017 sa Conference Hall sa Clergy house sa dakbayan sa Mati. Samtang gipasibaw usab kini sa pari sa iyang mga wali, labi na ang pag-awhag sa mga ginikanan sa pagbantay sa ilang mga anak ug sa paghatag sa hustong panig-ingnan sa panimalay, lakip ang pahimangno sa paglikay sa mga tawo sa mga dapit nga nagapang-haylo sa mga ginadiling droga ug ubang mga klase sa kalaswaan nga makita usab sa mga hulagway sa lain-laing klase sa social media ug video-cinema. Agig tubag sa problema sa droga, gihagit usab sa otoridad sa simbahan ang mga pundok sa kabatan-onan sa Diocesan Youth Apostolate (DYA) ug mga ginikanan sa Family Life Apostolate (FLA) aron mopahigayon og mga kalihokan sa edukasyon alang sa maayo ug responsableng pagkinabuhi ug pag-inubanay tungod kay ang gamut-hinungdan sa pagkasukamud sa tawo sa mga ginadiling droga mao ang mga problema sa pamilya. Nasayran usab nga ang nadugang nga program sa Voluntary Submission to Reformation(VSR) alang sa mga biktima sa droga ang mipahigayon usab og mga kalihokan sa edukasyon ug rehabilitasyon sa pakigduyog sa mga lokal nga panggamhanan kon Local Gov’t Units (LGU).

Ang mga parokya ang gitahasan sa pagpahigayon sa nagkadaiyang mga programa, kasagaran mga “counseling sessions” alang sa paggiya sa mga drug dependents and victims pinaagi sa FLA, DYA, ug VSR. Gani, nagkahiusa ang naasoyng mga pundok sa pagtukod sa mga core group nga maoy motutuk ug moplano sa mga buluhaton. Niadtong Hulyo 14-15, gi-sponsor sa FLA ug VSR ang asambleya sa ilang mga miyembro alang sa hiniusang pagtuon, orientasyon ug pagbansay sa mga kahibalo sa pagtratar sa mga drug victims. Sumala ni diocesan FLA / VSR director Fr. Edilberto R. Mahinay, nagtapok ang 173 ka mga partisipante sa nagkahalo nga leaders, volunteers and victims. Gihimo ang asambleya sa St. Joseph Retreat House sa Dahican, Mati City. Gidapit ang mga banggiitang psychologists ug trainers alang sa asambleya. Gisulti usab ni Fr. Mahinay nga ang ilang aksyon maoy usa ka paagi sa pagtubag sa panawagan sa mga LGUs ug sa nasudnong panggamhan alang sa paghunong sa krimen sa droga.

Kahinumduman nga sa miaging bulan sa Enero 2017 si Fr. Mahinay nagpakita sa suporta sa simbahan pinaagi sa VSR diha sa paglusad sa provincial government sa ‘Mamamayang Ayaw sa Anomalya, Mamamayang Ayaw sa Ilegal na Droga (MASA-MASID). Gipasabot sa pari nga ang simbahan makiglambigit tungod kay hugot nga ginaduso niini ang pagtahud sa dignidad ug mga katungod sa katawhan, sama sa dakung tinguha usab sa gobyerno; ug sa mao nga mga katuyu-an dili maka-ako ang simbahan nga magpakahilom. Matud pa niya, sa pagduso og mga kabag-ohan, labi na ang inner conversion, gikinahanglan gayud ang grasya sa Diyos. Ang MASA-MASID nahisakop usab sa programa sa Ugnayan ng Barangay at Simbahan (UBAS) nga uban sa relihiyosong sector, nagtinguha sa paghulma sa “culture of transparency and good, clean governance.”