Lima na ka dekada sa Pilipinas: Borromeo Sisters padayon ang pagtabang

Sisters of Charity of St. Charles Borromeo (Kuha ni Jairus Viola | SJP SoCCom)

Ang Sisters of the Charity of Saint Charles Borromeo nagsaulog niadtong Hunyo 26 sa ika-180 nga kasumaran niini sa sa tibook kalibutan.

Mikabat na sa 50 ka tuig human kining kongregasyon miabut sa Pilipinas, 48 ka tuig dinhi sa Matina Aplaya, Davao City.

Sumala ni Sr. Chris Lagunsad, mission coordinator sa maong kongregasyon, hilabihan ang iyang kalipay sa maong selebrasyon diin siya nahimong kabahin sulod sa 40 ka tuig.

Dugang pa niya nga ang ilang misyon mao ang pagpakaylap sa gugma sa labaw’ng makagagahum ug ipang hatag sab sa uban ang ilang mga grasyang nadawat sa kahitas-an hinungdan nga ilang gipalapdan ang ilang gihimong pagtabang sa 60 ka kabataang badjao nga gipaeskwela ug ginapakaon.

Sumala pa ni Sr. Lagunsad nga kawang ang paghatud sa kabataan sa eskwelahan kung way sulod ang tiyan. Mikabat na sa 7 ka batang lumad ang ilang gipaeskwela sa kolehiyo ug duha nila hapit na mu-gradwar.

Nasayran nga ang kongregasyon adunay 600 miyembro sa tibook kalibutan, 34 kanila mga Pilipina nga naa sa Dabaw, laing 14 ang langyaw.

Giklaro ni Sr. Lagunsad nga wala sila nanghinaut sa pagbalos sa ilang pagtabang sa mga kabus. Gipalapdan pa nila kining pagtabang tungud gusto nila nga ang pagsangyaw ipaagi sa buhat, aron muuswag ang matag komunidad diin sila kabahin.

Ubos sa landong sa giilang “Apostoles sa Gugma” St. Charles Borromeo, ilado ang kongregasyon sa pagtabang sa mga balay-tambalanan ug pag edukar sa Kristohanong pagtulon-an sa mga bata. (Bien Abanos)