Kapistahan sa parokya sa Bunawan malipayong gisaulog

Ang parokya sa Sr. Santiago Apostol, Bunawan nagsaulog sa ika-55 nga kapiyestahan niadtong Hulyo 25, 2017 subay sa tema nga: “Sr. Santiago ang atong Katabang sa Pag-angkon sa Panaghiusa ug Kalambuan sa mga GKK sa atong parokya.”

Isip selebrasyon sa iyang kapiyestahan, nagsaulog ang parokya sulod sa siyam ka adlaw ug novena mass sugod Hulyo 16 hangtud Hulyo 24, kada hapon. Ang maong novena gisaulog inubanan sa mga pari, ilabina ang Kura Paruko niini nga si Rev. Fr. Romel Banilad. Dako pud kaayo ang pasalamat sa parokya sa tanang mga parokyano, donors, sponsors, families ug indibidwal nga misuporta ug migahin sa ilang oras ug panahon alang sa novena. Niadtong Hulyo 20, 2017, nagpahigayon uban atong Arsobispo Romulo Valles, D.D. ug kompirmasyon nga nikabat sa 207 ka batan-on inubanan sa ilang mga ninong ug ninang.

Sa adlaw’ng kapiyestahan niini, adunay prosesyon alas 5:30 sa kaadlawon nga nagsugod sa simbahan padulong sa Bunawan Public Market dayon balik sa simbahan. Gipahinumduman usab ang mga katawhan nga walay pagahimoon nga pampublikong kalingawan sa bisperas sugod sa pagsalop sa adlaw kay gigahin kini sa pagpamalandong.

Sa alas 6:00 sa buntag gisaulog ang unang misa ug sa alas 8:00 sa buntag ang pontifical mass.

Naandan napud sulod sa pila na katuig ang “Pagbuak sa Alkansiya sa Bokasyon” human sa ikaduha’ng Santos nga Misa. Kining maong aktibidad gihimo isip tabang sa mga seminarista didto sa Regional Major Seminary.

Nagpahigayon usab ug mga Parlor Games nga gipangunahan sa kabatanonan sa parokya. Lakip pa sa mga aktibidades mao ang mga nisunod: Booth Contest sa matag sona, Singing Contest, ug presentasyon sa matag sona. Pag abot sa udto nag-ambit ang tanan sa salu-salo.

Sa pag-ampo, sakripisyo ug pagmaya, nagmalampuson gayud ang maong kapistahan. (Melyn Barquin | SJAP SocCom)