Bag-ong mga Kampana sa San Pedro Cathedral mibagting na

Adunay bag-ong huni sa mga kampana ang madunggan matag oras sa Dakbayan sa Dabaw, ang mga bag-ong mga kampana sa San Pedro Cathedral.

Sugod sa selebrasyon sa ika-169 nga kapistahan ni San Pedro, mibagting na ang mga bag-o ug modernong mga kampana Huwebes, Hunyo 29, 2017 nga pormal nga gi bendisyonan ni Arsobispo Romulo G. Valles, D.D. una sa pontifical mass sa alas ocho ang takna sa buntag.

Walo ka mga bag-ong kampana ang gitaod sa kampanaryo nga nahimutang sa eskina sa mga dalang San Pedro ug C.M. Recto, Davao City.

“Dunay tulo ka mga dagkong kampana ug laing lima ang mobagting matag oras,” sulti ni Leenard Baquial, nagtrabaho sa opisina sa San Pedro Cathedral ug maoy usa sa mitabang sa pagtaod sa mga kampana.

Matud niya nga ang pagbagting sa mga kampana mag-agad sa usa ka dakong orasan nga gitaod usab sa kampanaryo, busa matag oras, madunggan ang pagbagting sa mga kampana.

“Kung mag brownout, motultol ug iya sa ensaktong oras ang orasan sanglit duna kini kaugalingon nga global positioning system kon GPS,” dugang ni Baquial.

Ang labing dako sa walo ka mga kampana adunay gimbug-aton nga 600 kilos ug ginama kini gikan sa nasud Austria.

Gidungagan ang unang kampana nga gitaod kanhi sa panahon ni Bishop Patricio H. Alo. (Bien Abanos)