52nd Parochial Fiesta: St. John the Baptist Parish, Lasang

Nagmalampusong gisaulog niadtong Hunyo 24, 2017 ang Solemnidad sa Adlaw’ng Natawhan ni San Juan Baustista sa tibook kalibutan. Daghan ang mga pamilyang naghiusa sa maong selebrasyon, ang uban naligo sa sapa, swimming pool, ug dagat sama sa naandang tradisyun.

Sa St. John the Baptist Lasang, Dakbayan sa Dabaw, nagmasadyaon sab ang mga parokyano niini sa ika-52 nga kapistahan. Gipangulohan ang pontifical mass alas nuebe sa buntag sa Arsobispo sa Dabaw Romulo G. Valles, uban ang Kura Paroko Fr. Arnulfo Cubero, kaabag nga pari Fr. Florencio Acedo, ug mga bisitang sila Fr. Ritsche Gamaya ug Fr. Jose Valdir Siquera.

Sa wali ni Abp. Valles, iyang gipunting nga pinaagi sa kapistahan ni San Juan Bautista kita napaduol sa Labaw’ng Makagagahum.

“Pinaagi sa paghandum nato kang San Juan Bautista diha sa iyang pagkatawo, kining atong lihok sa pag-ampo magdala nato sa atong kasingkasing ug hunahuna, tibook natong pagkatawo, ngadto napud sa pag ampo, pamalandong, pagdayeg sa Ginoo nga mao gyu’y gisimba nato karun,” sumala niya.

Dugang niya nga instrumento lang si San Juan.

“Instrumento lamang siya kay siya pod nakadawat sa grasya gikan sa Ginoo, talagsaong tawag gikan sa Ginoo, busa kada fiesta ang punterya gayud nato, atong padulngan, atong gihangad, atong giampoan mao ang atong pinalangga nga Dios nga nagpangga kanato kanunay.”

Samtang ang maong kapistahan gidogok sa mga parokyano, anaa sab ang presensya sa kasundalohan nga nagbantay sa seguridad sa selebrasyon, gikan sa nagkadaiyang bahad sa mga dautang tawo.

Nasayran sa 50th fiesta souvenir book nga ang maong parokya aduna nay 60 ka mga Gagmay’ng Kristohanong Katilingban (GKK) sukad nga gitukod kini niadtong tuig 1965. Ang unang patron sa maong parokya mao si Santa Catalina sa Alexandria apan sa tuig 1995 sa panahun ni Reberendo Padre Ben Capulong, giilisdan ang ngalan niini’g San Juan Bautista. Kini tungod nga mas ilado sa katawhan si San Juan.

Samtang gikabutyag ni Roberto Cadeliña, ang GKK coordinator nga dili matugkad ang iyang kalipay. Gani, iyang gipanghinaot nga magpadayon ang pag uswag sa ilang parokya kuyog ang paglambo sa ilang komunidad. (Bien Abanos | Photos by Karl Ingan-eng)