169th Fiesta gisaulog sa San Pedro Cathedral

Gisaulog sa mga parokyano ang ika-169 nga adlaw sa kapistahan sa patron nga si San Pedro niadtong Huwebes, Hunyo 29 subay sa tema, “Simbolo ug Sumbanan Nga Nagagiya sa Kahiusahan sa Katawhan.”

Ang adlaw sa kapistahan gisugdan sa duha ka nagsunod nga Santos nga Misa, alas 5 sa buntag og gisundan sa alas 6:30. Gipahigayon ang blessing sa 8 ka bag-ong kampana nga gidonar sa Evangelista ug RVM/UIC Community alas 8 sa buntag bisan tuod sa kakusog sa ulan. Gisundan kini sa Santos nga Misa nga gipangulohan ni Davao Archbishop Romulo G. Valles, D.D.

Ang wali sa Misa nagpahinumdom sa katawhan nga adunay kahayag luyo sa kangitngit ug ang pagkamaampu-on maoy maghatag og paglaom sa matag usa. Gibutyag ni Archbishop Valles nga nagkatapok ang katawhan tungod sa grasya sa pagtoo.

Matud pa ni Elsa Godin, 63 anyos, tubong dakbayan, malipayon siya sa nahitabong kapistahan ug ang wali nga iyang nadungog nagtudlo kaniya sa pagbuhat og maayo, mahimong maampu-on ug musalig lang gayod sa Ginoo.

Malipayon usab si Rehina Sosobrado 53 anyos nga nakasimba siya karong kapistahan sa patron kay dungan kini sa iyang adlaw’ng natawhan ug kada tuig siya naga-uban sa pagsaulog niini.

“Atong pakusgan pa ug atong palawman ang atong pagka maka Diyos and let’s entrust ourselves in the hands of our Lord,” sulti ni Arsobispo Valles. “Let’s examine kung makadiyos ba gayud ta pinaagi sa pagtan aw sa atong binuhatan sa pang adlaw adlaw sa atong kinabuhi,” dugang niya.

Malantaw usab ang live streaming sa FB page: DXGN 89.9 Spirit FM-Davao. (Genierose Cabañero | HCDC intern)