St. Francis Xavier Parish: 13th Day

“Si Jesus buot mugamit kanimo aron mailhan ako ug higugmaon. Buot niyang itukod sa kalibutan ang debosyon sa akong Putling Kasingkasing.” Mao kini ang misyon nga gihatag sa atong Birhen sa Fatima atol sa Iyang ikaduhang aparisyon ngadto sa tulo ka batang magbalantay sa mga karnero sa Cova da Iria sa Fatima, Portugal niadtong Hunyo 13, 1917.

Niining adlawa, eksaktong usa ka gatos katuig ang milabay human sa ikaduhang aparisyon, gihinumduman sa Parokya ni San Francisco Javier sa Tibungco ang maong panghitabo pinaagi sa usa ka prosisyon ug pag-ampo sa Santos nga Rosaryo sa sulod lang sa compound sa Parokya. Misunod dayon ang Santos nga Misa nga gipangulohan ni Rev. Fr. Severino A. Capulong Jr., DCD, ang kura paroko. Human sa Santos nga Misa giawhag ni Fr. Ben ang mga katawhan sa paghimo og personal nga adorasyon atubangan sa Blessed Sacrament didto sa Adoration Chapel sa Simbahan. (Vivien Therese Bonzon | SFX SoCCom)