SOPA, testimonya sa Adlaw sa Parokya

Miduyog ang parokya sa St. Francis of Assisi-La Verna sa hiniusang pagsaulog sa Tuig sa Parokya niadtong Dominggo. Human sa misa nga gipangulohan ni Fr. Junar dela Victoria, gipalawman sa PSK Coordinator nga si Arlene Intripido ang logo sa maong selebrasyon. Misunod ang State of the Parish Address (SOPA) nga gihatag sa kura paroko.

Sulod sa maong SOPA mao ang financial status ug parish statistics sa kasamtangan ug projections niini sa umaabot pa nga katuigan. Gisunod ang mga testimonies og success stories sa mga piniling GKK Servant Leaders. Usa nila mao si Bro. Jun Bernaldez, PSA sa GKK St. Vincent Ferrer, St. Vincent Heights Subd. nga sakop sa Sona 4.

Iyang gipaambit ang proyekto sa GKK nila nga mao ang “Artes de San Vicente” nga nahimong nominado sa National Livelihood Competition, tuig 2016. Matud niya, “daku kaayo kini ug natabang sa among mga membro ilabina kadtong mga nawad-an ug panginabuhian.”

Ikaduhang mihatag ug testimony si Bro. Robert Herrero, Chairman sa Finance Council sa parokya. Iyang gipaambit ang kadaugan sa ilang Pundok-Banay sa ilang GKK diin nakadani sila ug mga membro nga andam moapil sa mga kalihukan.

Ikatulo si Babino Casanaan, ang PSB Coordinator sa parokya. Gidasig niya ang mga batan-on sa pag-apil sa mga kalihukan sa GKK ug sa parokya. Mihangyo usab siya nga kinahanglan ang suporta sa mga hamtong. Mipasundayag usab sa ilang Kanta, Sayaw ug Drama (KASADRA) ang mga batan-on.

Human sa programa gisunod ang salo salo sa 19 ka mga GKKs nga sakop sa parokya. Nanguli ang GSLs nga puno sa mga pagtulon-an ug inspirasyon nga nakuha sa matag usa. (Sylvia Orbeta | SFA LaVerna)