Santisima Trinidad gipasabot sa Malabog atol sa ‘Tuig sa Parokya’

Malipayon nga gisaulog sa mga parokyano sa San Roque Parish Malabog ang Tuig sa Parokya niadtong Dominggo, Hunyo 11. Nagmisa si Fr. Jemasol Ortiz, kura paroko uban ang bag-ong pari, Fr. Jeus Jardin.

Siya nagsaulog sa iyang sacerdotal anniversary. Sulod sa misa, gisend forth ang mga pangulo sa ministriya. Giturn-over usab ang secretariat position sa Cursillo in Christianity movement diin si Fr. Ortiz ang Spiritual Director.

Sa wali ni Fr. Ortiz, lisud daw sabton ang Santisima Trinidad, lisod tugkaron ug lisod tun-an apan, sayon bansayon ug puy-an. Tulo ka persona sa usa ka Ginoo; different functions in spiritual salvation. Una ang Amahan mao magbubuhat sa kalibotan, ang Anak mao nga gilitok nga pangalan sumala sa pagbunyag ni Juan kang Hesus, Espiritu Santo ang gibilin ni Jesus sa mga apostoles sa dihang nisaka na siya sa langit nga nahitabo sa Pentecost Sunday.

“Aron dali bansayon himuon kini sa 3-minute prayer exercise, 1 minuto kada tao, kada adlaw. Sa Amahan usa ka minute sa prayer sa pagmata isip pagpasalamat kaniya. Sa Espiritu sa atong paglakaw, 1 minuto nga mangayo ta ug giya ug lamdag padulong sa atong trabahuan, sa Anak, 1 ka minuto bag-o ta matulog, sutaon atong kaugalingon. Kung nakabuhat ug mayo, pasalamat, kung dili mangayo ug pasaylo,” sumala pa ni Fr. Ortiz.

Si Nenita Bonsubre, asawa sa Pangulo sa Liturhiya Parish Coordinator miingon, “ang panaghiusa sa parokya nag agad sa matag pamilya nga sakop sa GKK tungod kay ang pamilya giila nga gamay nga Simbahan. Ang Simbahan mao ang lawas ni Kristo. Kita ang mga sakop sa lawas ni kristo, nga naghiusa sa gugma, kalinaw, ug pagkamapaubsanon. Busa ipadayon ang misyon ni Kristo niining pagsaulog sa Tuig sa Parokya.

Dose ka lechon, duha ka sakong bugas ang paniudto sa taga Malabog. Parlor games dayon ang nisunod nga gipangunahan sa mga batan-on. (Imelda Overiz | SRP SoCCom)