Pagtugyan ug paghalad sa Putling Kasingkasing ni Maria

Karong umaabot nga Sabado, Hunyo 24, 2017, gitakda ang tinuig nga pagbag-o sa pagtugyan sa nasud ngadto sa Putling Kasingkasing ni Maria. Sa tanang simbahan sa Pilipinas, ipahigayon ang misa sa Putling Kasingkasing ni Maria diin himon ang maong pagtugyan.

Si Padre Catalino Arevalo, SJ, niadtong 2013 naghimo ug “primer” niining nasudnong kalihokan, diin iyang gihatag ang mubo nga teolohiya sa Pagtugyan ug Paghalad. Buot nakong ipaambit kini sa atong mga suking tigbasa sa Davao Catholic Herald. Ania ang iyang gipahayag:

Unang Bahin

PAGTUGYAN UG PAGHALAD
Matag Kristohanon konsagrado.Sa ato pa, gihalad na ug gilahi na. Siya gihiusa na sa Balaan, sa sagrado, nga mao ang Santissima Trinidad: Amahan, Anak ug Espiritu Santo diha ug pinaagi sa Bunyag. Si San Agustin nagtudlo, “Si Cristo gayud ang nagbunyag.” Ang Dios gayud ang nagbalaan, naghimo nga sagrado sa gibunyagan, per ipsum, et cum ipso, et in ipso, pinaagi kaniya, ug uban kaniya ug diha kaniya, diha sa kahiusa sa Espiritu Santo. Kining pagkabalaan tinuod nga gibag-o ug gipakamatud-an sa matag sacramento.

Gawas pa niining una ug labing labaw nga pagbalaan, ang Simbahan nag-ila sa ‘ubang mga paagi’ nga nagtabang sa pagtin-aw ug pagpabag-o sa pagkabalaan nga nadawat sa sakramento, o konsakrasyon. Niining ubang mga konsakrasyon, ang mga nadawat sa bunyag, pinaagi sa grasya sa Espiritu Santo, mapukaw ug mabanhaw aron mamahimo sila nga labi pang masinati sa Kristohanong kinabuhi.

Ang mga panumpa sa relihiyosong kinabuhi, nga gibuhat niadtong mga mosulod sa gitawag nga kinabuhing konsagrado isip sakop sa mga relihyoso nga mga pundok o kongregasyon, mao tingali ang labing nailhan nga ‘ubang paagi’ nga giila sa Simbahan ug sa iyang mga balaod.

Apan adunay ubang mga konsakrasyon ug mga konsacrasyon nga debosyonal nga na dugtong sa mga apostolikanhong mga buhat o mga debosyon nga gidawat ug gipanalanginan sa Simbahan. Uban sa grasya sa Espiritu Santo, makatabang kini sa mga binunyagan, o sa mga pundok o mga katilingban sa mga binunyagan sa pagtubo ug pagpalambo sa kapuno sa paghalad sa kaugalingon diha sa pag-alagad sa Dios ug sa isig-ka tawo tungod ug alang sa gugma diha sa pagpuyo sa kristohanong kinabuhi ug tahas.

Kini mao ang kinaugalingong pagdawat sa usa ka Kristiano sa gasa sa Dios sa iyang kaugalingong kaluoy ug gugma, nga gidalit sa Dios sa matag usa kanato pinaagi sa pagpuyo sa atong konsakrasyon latas sa katuigan ug sa mga linahing takna sa kinabuhi. Mao kini ang pagsalmut sa usa ka Kristiano sa sakripisyo sa kinaugalingong paghalad ni Jesus ngadto sa Amahan, pagtubo sa kahingpitan sa pag-ambit niini, aron tiunay nga makapuyo siya sa kinabuhi ni Jesus, ug sa mausab siya ug motubo sa hinayhinay diha sa kasamahan ni Cristo.

Niini naghiusa si Jesus sa Kristiano nga labing suod kaniya. Ang Kristiano, isip sinagop nga anak sa Dios, gitisok diha sa uyok sa kinabuhi sa iyang Lawas nga mao ang Simbahan dinhi sa yuta, busa nag-apil usab siya sa kaugalingong panaghiusa ni Jesus uban sa iyang Amahan. Busa ang buhing Jesus maglukop sa kinabuhi ug buhat sa usa ka kristohanon. Niini ang Kristohanong tao nag-ambit sa makaluwas nga pagpakig-uban ug buhat ni Jesus sa kalibutan ug sa panahon. Niini ang Kristohanon pinaagi sa iyang apostolado sa tahas o misyon ni Cristo ug sa Iyang Simbahan karon.