Paghalad ug pagtugyan ngadto sa Mahal nga Kasingkasing ni Jesus ug Putli nga Kasingkasing ni Maria

Ni Padre Catalino Arevalo, SJ
Ikaduhang Bahin

Sa mga ‘ubang konsakrasyon’ atong hisgutan ang Paghalad ug Pagtugyan sa Mahal nga Kasingkasing ni Jesus, “ang kasingkasing nga linagbasan, ni Jesus, ug ang paghalad ug pagtugyan sa Putli nga kasingkasing ni Maria.

Ang mga pulong ni Jesus sa katapusang panihapon (Juan 17:9,17-19) nagpahatag sa “gamut” sa atong paghalad ug pagtugyan ngadto sa Dios, “Nag-ampo ako alang kanila, kay imo man sila. Balaana sila diha sa kamatuoran, ang imong pulong kamatuoran. Gipadala ko sila sa kalibotan sama nga ako imong gipadala ngadto sa kalibotan. Ug tungod kanila gitugyan ko ang akong kaugalingon nganha kanimo aron maimo sila.”

Sama nga gitugyan ni Jesus ang iyang kaugalingon ngadto sa Amahan alang ug tungod kanato, iya usab nga mahiusa sa iyang kaugalingong paghalad ug pagtugyan ang atong kaugalingon ug ang atong mga halad. Ang atong mga buhat sa paghalad sa kaugalingon ug pagtugyan ngadto sa Dios dawaton sa buhing Jesus diha sa himaya ug idugtong sa iyang kaugalingong pagtugyan sa Amahan pinaagi sa Espiritu Santo. Ang buhing Jesus naghatag kanato sa grasya nga atong gikinahanglan sa pagmatuod sa atong kaugalingong halad diha sa atong kinabuhi o adlaw-adlaw nga pagpuyo.

Ang atong mga buhat sa kaugalingong paghalad ug pagtugyan atong gibuhat una sa tanan ngadto kang Jesus, ngadto sa iyang Mahal nga Kasingkasing, aron sa paghingpit niini diha sa paghalad sa Amahan, diha, uban, ug pinaagi ni Jesus ug sa Mahal nga Kasingkasing ni Jesus. Ang pagsubay, ang pagsunod ug ang pag-apil sa kinabuhi ug kasingkasing ni Jesus maoy tumong sa spirituhaong kinabuhi sa matag Kristohanon ug sa matag Kristohanong katilingban.

Ang atong paghalad ug pagtugyan ngadto sa Putling Kasingkasing ni Maria kinahanglan gayud nga madugtong sa atong paghalad sa Mahal nga kasingkasing ni Jesus. Dili mahimo nga bulagon ang duha.

Ang atong paghalad ug pagtugyan ngadto sa Putli nga Kasingkasing ni Maria anaa sa iyang pagka-siya, nga nahiusa sa iyang Anak, ang Pulong nga nahimong Tawo. Kining panaghiusa nila talagsaon ug walay ikagsama:

• Tungod kay si Maria Inahan Niya, tungod sa bugkos sa pagka Inahan sa Dios.
• Tungod sa walay ikagsama ug talagsaon nga pakig-duyog ni Maria sa buhat sa pagpangluwas nga gibuhat sa iyang Anak ug sa makaluwas nga tigpatiwala sa iyang Anak.
• Tungod kay si Maria Inahan sa Lawas ni Cristo (ang Simbahan) ug Inahan sa mga sakop sa
  Simbahan.

Nagtugyan ug naghalad kita sa atong kaugalingon ngadto sa Putli nga Kasingkasing ni Maria isip “timailhan sa iyang inahanong gugma ug iyang inahanong tigpataliwala alang kanato sa diosnong grasya ug kaluoy.”

Si Papa Juan Pablo II nagtudlo nga “ang pagtugyan sa atong kaugalingon ngadto sa Dios pinaagi sa ulay ug inahanong mga kamot ni Maria, pinaagi sa iyang Putling Kasingkasing, mao ang pag tugyan ug paghalad sa atong kaugalingon ngadto kaniya isip Inahan ni Jesus ug Inahan natong tanan, isisp Inahan sa walay kinutubang Gugma ug Kaluoy.”

Ang atong Bulahan Birhen nagmando kang Sister Lucia nga mag-alagad siya sa pagpakaylap sa pagdugtong sa debosyon sa Kasingkasing ni Jesus ug Putli nga Kasingkasing ni Maria. {Mao kini nga si Papa Pablo VI mipahiluna sa pangilin sa Putli nga Kasingkasing ni Maria gikan sa Agusto 22, ngadto sa Sabado human sa pangilin sa Mahal nga Kasingkasing ni Jesus.} Si Papa Juan Pablo II midasig sa paghalad ug pagtugyan ngadto sa Mahal nga Kasingkasing ni Jesus ug sa Putli nga Kasingkasing ni Maria, nga gitukmod sa Espiritu Santo diha sa “Alliance of the Two Hearts of Jesus and Mary”. {Kinuptanan sa Duha ka Kasingkasing ni Jesus ug ni Maria}

Ang sumada sa tanan natong gihisgutan gilitok ni Papa Juan Pablo niining mga pulonga didto sa Fatima sa 13 sa Mayo sa tuig 1982:

“Tan-awa, ania kami nagabarog sa imong atubangan, Inahan ni Cristo, ania kami atubangan sa imong Putling Kasingkasing, buot kami, uban sa tibuok Simbahan sa paghiusa sa among kaugalingon nianang paghalad ug pagtugyan sa iyang kaugalingon ngadto sa Amahan, nga tungod sa iyang gugma alang kanamo, gihimo sa imong Anak, “Ug tungod kanila gitugyan ko ang akong kaugalingon nganha kanimo aron maimo usab sila.” (Juan 17:19) Buot kami maghiusa sa among kaugalingon uban sa among Manunubos niiniing iyang pagtugyan ug paghalad alang sa kalibutan ug sa tawhanong kaliwat, nga diha sa iyang Diosnong Kasingkasing, adunay gahum sa pagdangat og pasaylo ug pagkab-ut sa pagbayad sa sala.”

“Ang gahum niining pagtugyan maghangtud sa tanang panahon ug naglakip sa tagsa-tagsa sa mga tawo, sa tanang katawhan,ug tanang kanasuran. Nagbuntog sa tanang kadautan nga ang espiritu sa kangitngitan makapukaw ug nagpukaw na niining among panahon sa kasingkasing sa mga tawo ug sa iyang kasaysayan.”

“Pagadayegon ka, Inahan ni Cristo, nga tiunayng nakighiusa sa makaluwas nga pagtugyan ug paghalad sa imong Anak.” (Gihubad sa: Society of the Angel of Peace)