Kapistahan sa parokya sa Dacudao nagmalampuson

Ang Mary Help of Christians Parish nagsaulog sa ilang kapistahan niadtong Mayo 24, 2017, Dacudao, Calinan, Davao City.

Sa wala pa nagsugod ang mga adlaw sa novena, nagkahiusa ang mga ministriya ug mga sona nga sakop sa parokya, sama sa Knights of the Altar (KOA) nga manaud ug flaglets ug bantings, iandam ang mga gamit sa misa ug manlimpyo sa simbahan.

Ang mga miyembro sa Don Bosco Dacudao Youth Council (DBDYC) mitabang usab sa pagpangandam sa mga kalihukan. Matag adlaw sa novena adunay naka-assign nga mga sona ug ministriya nga mu-sponsor, mubasa nga lectors ug muhalad sa Santos nga Misa.

MAYO 17, 2017. Gipahigayon ang pag-instalar sa bag-ong Director sa Salesian Community dinhi sa Davao District, nga mao si Rev. Fr. Orlando Borres, SDB nga gikan sa Cebu. Gitambungan kini sa mga Salesianong pari nga gikan sa nagkalain-laing Salesian Communities sama nila Fr. Franco Uras, SDB, Fr. Godofredo Atienza, SDB nga mao ang Provincial Director sa Salesian Community sa South Province, Fr. Eligio Gregorio Santos, SDB ang kanhing Director sa Salesian Community sa Davao District, ug si Fr. Marcelino Benabaye, SDB ang kura paroko sa maong parokya.

MAYO 21, 2017. Gikompirmahan ang 190 nga hamtong ug mga batan-o nga nag edad ug 12 anyos pataas. Ang Santos nga Misa nagsugod alas onse sa buntag nga gipangulohan sa atong Arsobispo Romulo G. Valles, D.D. Sa iyang wali, iyang gipasabot nila nga ang kompirmasyon mao ang usa ka sakramento sa pagpasakop sa simbahan isip usa ka kristiyano ug kini nagtimaan ug bag-ong ang-ang sa kristohanong kinabuhi.

MAYO 22, 2017. Gipahigayon ang Kasalan ng Parokya nga gilangkuban ug napulo (10) ka paresan nga gikan sa naglain-laing mga GKK nga sakop sa Parokya. Sa maong adlaw usab gipahigayon ang Parochial Culmination Day sa “Flores de Mayo” nga giapilan ug 245 ka mga bata, 31 nga mga Pangulo sa Pagpanudlo (PSP) ug 33 ka young catechists.

Gipadula ang mga batang nahisakop sa Zone 3A – Zone 6B pagkabuntag ug pagkahapon ang mga bata na usab nga gikan sa Zone 1A – Zone 2 ang nakahigayon sa paglingaw. Ang mga bata nagpakita sa ilang mga talento pinaagi sa mga nagkandaiyang presentastyon. Sila usab ang sponsor sa Santos nga Misa sa maong adlaw.

MAYO 23, 2017. Gipahigayon ang “One Day Volleyball League” nga giapilan sa 5 ka sona, nga mao ang Zone 2, Zone 3B, Zone 4, Zone 5, ug Zone 6A. Ang matag team gilangkuban ug 6 ka pangulo nga gikan sa mga nagkalain-laing ministriya diha sa ilang sona. Nahimong kampeon sa dula ang Zone 5.

Sa maong adlaw usab gipahigayon ang prusisyon sa mga patron sa matag GKK nga sakop sa Parokya ug ang patron usab ni Maria Mananabang sa mga Kristiyanos. Ang mga ming-alsa sa mga karo sa matag patron mao ang mga pangulo sa matag GKK, samtang ang mi-alsa sa karo ni Maria mao ang mga batan-on.

Ang prusisyon nagsugod sa barangay gym padulong sa Parokya. Pagkahuman ug plastar sa mga Santo gisugdan na dayon ang Santos nga Misa nga gipangulohan sa bag-ong Rector sa Salesian community dinhi sa Davao District nga mao si Rev. Fr. Orlando Borres, SDB.

Pagkahuman sa Misa nagtinabangay ang mga pangulo sa nagkalain-laing ministriya sa pagpangandam alang sa sunod nga adlaw nga mao ang Pista.

MAYO 24, 2017. Ang fiesta mass nagsugod sa Misa alas 9:00 sa buntag nga gipangulohan ni Arsobispo Romulo G. Valles, D.D. Sa homiliya ni Arsobispo, iyang gipadayag ang pagkalig-on sa pagtuo ug pagsalig sa mga parokyano bisan pa man sa mga kagubot sa palibot ug mga pagsulay nga miabot sa kinabuhi sa matag usa, nagpabilin gihapon sila sa pagsalig ug pagtuo sa Mahal na Patron nga si Maria Mananabang sa mga Kristiyanos.

“Isip mga kristiyano, kita usab unta mamahimong lig-on sa atong pagtoo ug pagsalig sa atong Ginoo ug dili kita mahuyang bisan pa man sa mga kalisod nga atong maagian diha sa atong kinabuhi…kita usab magpadayon sa pagpangalagad kaniya,” matud pa niya. Nakigduyog sa misa ang mga pari sa bikaryato sa Sacred Heart of Jesus ug mga Salesianong pari nga sila Fr. Ricky Flores, Fr. Arnel Tadeo, Fr. Raul Nieves, Monsignor Jimmy Gamboa, Fr. Adriano Satura, SDB , ang kanhi kura paroko sa maong parokya, Fr. Orlando Borres, SDB ang bag-ong Rector, ug si Rev. Fr. Marcelino Benabaye, SDB, ang kura-paroko.

Sulod usab sa misa gihatagan ug mga certificate ang mga personalidad nga ming donate sa yuta nga gitukaran sa parokya nga mao sila Honorable Petite Principe ug Doctora Eucaristiya Feliciano. Gihatagan usab ang mga Couple GSL nga nangalagad gikan sa pagsugod sa parokya hangtud karun nga mao sila, Mr. and Mrs. Cornelio Amora, Mr. and Mrs. Oscar Tubal, Mr. and Mrs. Jimmy Abay-Abay, Mr. and Mrs. Felix Mahinay, Mr. and Mrs. Antonio Torres, Mr. and Mrs. Patricio Opendo, Mr. and Mrs. Leonilo Bantasan, Mr. and Mrs. Eligio Manangan, Mr. and Mrs. Oscar Alonilo, Mr. and Mrs. Bartolome Carillo, Mr. and Mrs. Juanito Alcoreza, Mr. and Mrs. Vergilio Banac, Mr. and Mrs. Roberto Villanueva, Mr. and Mrs. Modesto Alviso, Mr. and Mrs. Hilarion Dayag, Mr. and Mrs. Hilarion Caminse, Mr. and Mrs. Victor Remorosa, Mr. and Mrs. Matias Carillo, Mr. and Mrs. Romeo Carillo, Mr. and Mrs. Jeffrey Siton, Mr. and Mrs. Jerry Tangob, Mr. and Mrs. Chris Angelo Luma, and Mr. and Mrs. Avilino Nuñez.

Pagkahuman sa Santos nga Misa nangadto na ang mga parokyano sa ilang mga nagkalain-laing sona alang sa paniudto. Gisunod na dayon ang Bible Quiz nga giapilan sa mga pangulo sa matag sona. Ang matag team gilangkuban ug 5 ka mga pangulo gikan sa mga ministriya nga mao ang PSP, PSB, PSL, PSK, ug PSA. Ang quiz giapilan sa mga formators sa maong Parokya. Nidaug sa maong quiz mao ang mga pangulo nga gikan sa Zone 3-B gisundan sa Zone 6-A, ug ang ikatulong midaug mao ang mga pangulo sa Zone 1-B. Pagkahuman, gipanghatag na sa ilang kura paroko ang ilang papremyo. Pagkahuman sa mga pagpanghatag nanguli na sila sa ilang tagsa-tagsa ka panimalay nga nangalipay ug nakat-on. (Jonah Somogod & Charlyn Bayo | MHCP SoCCom)