Happy birthday Fr. Toto!

Msgr. Gorgonio ug Padre Toto

Masadya gayud ang nahitabong panagtapok atol sa ika-58 nga adlaw’ng natawhan ni Padre Toto España, kura paroko, sa parokya sa San Antonio de Padua, Agdao. Miabot sa sayo sa kabuntagon ang pundok sa mga parokyano nga nag-mañanita kang Padre Toto. Nianang udto, nagsalo salo ang mga bisitang pari ug uban pa niyang mga higala sa paniudto.

Sa gabii, nagtapok diha sa St. Mary’s Hall ang mga GSL sa siyam ka sona ug ang ubang parokyano aron makighiusa kay Padre Toto sa iyang kalipay. Nagdala sila og mga pagkaon ug regalo aron ipakita ang ilang pagmahal ug kalipay sa ilang kura paroko. Adunay mga mensahe nga gihatag pinaagi sa video ug personal nga gisulti sa iyang mga parokyano ang nakapangisi gayud og dako ni Padre Toto.

Miabot si Msgr. Mat Gorgonio, ang kura paroko sa parokya sa Sta. Ana, aron moduyog usab sa selebrasyon. Ingon niya sa iyang mensahe nga nalipay siya nga amahan ang pagtan-aw sa mga parokyano kay Padre Toto ug nga “through thick and thin” nag-uban gayud ang parokya, si Padre Toto kauban ang iyang mga parokyano. Puno sa pagpasalamat si Padre Toto sa iyang mga parokyano ug siya miingon nga, “nakatatak na sa akong kasingkasing ang San Antonio de Padua.”

Nagpadayon ang pagkinantahay ni Padre Toto ug sa iyang mga parokyano sa karaoke bisan humana ang programa nianang gabhiona. (Elena Corazon Mozo | SAP SoCCom)