GSLs sa Holy Family nagdula-dula

Ang Holy Family Parish sa Brgy. Baliok, Davao City nagsaulog sa Parish Day atol sa Tuig sa Parokya nga selebrasyon, niadtong Hunyo 11. Kini gisugdan sa Santos nga Misa diin sponsors ang mga GKK Servant Leaders.

Nag motorcade padulong sa IWHA Gym ang mga parokya diin ilang gipahigayon ang pagpaugnat sa kusog pinaagi sa indoor games sama sa balloon bursting, fan the fish, bakya-bakya, egg catching, dress up the June bride, ug paper basketball.

Pinaagi sa pagdula nasukod ang kaabtik, panaghiusa, ug kahanas sa matag team hilabi na sa paghimo ug istratehiya aron makadaug sa matag dula. Giatngan sab sa mga parokyano ang basketball tali sa PSL ug GSL. Si Fr. Ricky Peñalosa, ang kura paroko, nidula usab kauban ang Team GSL nga maoy gidaug. Mensahe niya nga “isip simbahan dili lamang kita kutob ra sa pag-ampo ug pagsalmot sa mga espirituhanong buhat, apan kita usab makiglambigit sa uban pang aktibidad sa simbahan nga makatabang sa pagpalig-on sa matag GKK, komunidad ug nagkadaiyang ministriya sa parokya.”

Gitapos ang selebrasyon pinaagi sa usa ka paniudto diin nag-inambitay sa ilang balon ang mga miyembro sa matag Christian Community. (Flor Arellano-Deloria | HFP SoCCom)