Flores de Mayo culmination at San Antonio Parish, Agdao

Viva Maria!

Alas 8 sa buntag, niadtong Mayo 27, nagtapok didto sa Brgy. Duterte Gym ang mga bata ug kabatan-onan sa matag sona sa parokya sa San Antonio de Padua, Agdao, aron pagsaulog sa pagtapos sa Flores de Mayo niining tuiga.

Gisugdan nila kini sa pagdayeg kang Maria nga mao ang sentro sa selebrasyon pinaagi sa pag-ampo sa Santos nga Rosaryo. Samtang naga-ampo sila sa Santos nga Rosaryo sila usab mi-prosesyon padulong sa Simbahan sa San Antonio de Padua.

Gisundan dayun kini sa selebrasyon sa Santos nga Misa nga gipangulohan sa ilang kura paroko na si Fr. Leonie “Toto” España. Dakong kalipay sa mga bata nga mingnaog si Padre Toto sa panahon sa iyang homilya aron pakighimamat sa mga kabataan. Iya silang gipangutana kung unsa ang ilang gibuhat ug nakat-onan sa pag-apil sa Flores de Mayo. Iya usab nga gipasabot kung nganong adunay prosesyon sa Santa Cruzan o nganong naa may mga Rayna ang maong prosesyon.

Gihagit ni Padre Toto ang mga kabataan sa pag-apil sa Kasaulogan sa Pulong matag Sabado sa gabii diha sa ilang GKK ug pag apil sa Children’s Mass sa alas 3 sa hapon matag Domingo.

Sa katapusan, gipasalamatan niya ang tanan nga mitambong ug mitabang sa paghimo nga posible ang tibuok kasaulogan sa Flores de Mayo ug ang pagtak-op niini.

Pagkahuman sa Misa nagtapok ang tanan sa St. Mary’s Hall aron sa pagsalo sa gamay nga pahalipay nga giandam sa mga PSP alang sa mga kabataan. Nalipay gayud ang mga bata sa ilang mga gipangbuhat sa maong programa ug ang uban mipasundayag sa ilang talento na mas nakadugang sa kalipay sa mga kabataan nga mitan-aw. (JM Duran | SAP SoCCom)