Bible apostolate workers gisukod ang kahibalo sa Pulong sa Diyos

Bibliodrama. Bibliyampo. Bible Encounter.

Kini tulo sa mga aktibidad nga gina organisa sa Archdiocesan Bible Apostolate of Davao (ABAD) aron sa pagtapok, paghanas ug pagtudlo sa mga Bible apostolate workers kabahin sa Pulong sa Diyos.

Human mulampos ang 1st Archdiocesan Bibliodrama Workshop niadtong Abril 22, gipahitabo niadtong Hunyo 17, niining tuiga ang Archdiocesan Bibliyampo Congress 2017 sa St. Joseph the Worker Parish, Sasa.

Gitambungan kini sa 26 sa 39 ka mga parokya. Didto naghatag ug input ang ABAD Spiritual Director Fr. Ritsche J. Gamaya, DCD mahitungod sa tuig sa parokya. Iyang gihagit ang tanan nga mamahimong modernong apostoles sa Balaang Kasulatan. Dayon, gisaulog niya ang misa kauban ang kura paroko sa Sasa nga si Fr. Dionisio “Diony’ Tabiliran, DCD.

“Ang Pulong sa Ginoo ang maghatag kanato ug kadasig. Hinaut nga siya maghatag usab kanato ug lamdag sa Espiritu nga maoy mugiya kanato,” matud pa ni Fr. Tabiliran sa iyang wali. Iyang gipahinumduman ang mga partisipante sa kabililhon sa Pulong sa Diyos sa buhat sa apostolado.

“Himoon ang Pulong sa Dios nga magmabungahon sa kaugalingon, pamilya, katilingban, ug parokya hilabi na karon nga nagasaulog kita sa ‘Year of the Parish,’” dugang ni Fr. Tabiliran.

Bible Encounter

Mas popular sa tawag nga “Bible Quiz”, 14 ka mga Bible teams gikan sa 14 nga parokya ang nagtigi sa susamang adlaw.

Human ang lima ka rounds, True or False, Multiple Choice, Identification, Who Said and Whom Was it Said, ug Open Bible sulod sa 20 ka segundo, first placer ang Virgen Delos Remedios Parish, Crossing Bayabas, Toril, second placer ang Sacred Heart of Jesus Parish, Obrero ug third placer ang Sto. Rosario Parish, Toril.

Mensahe ni Elsie San, team leader sa VDLR, “unta sa kanunay himuon ang pagbasa sa bibliya aron madasig ang matag parokyano.” Gipasalamatan sab niya ang pagsuporta sa ilang Kura Paroko Fr. Johnny Autida nga sa kanunay nagaingon kanila nga magtuon pa.

Nagpasalamat ang Bible Coordinator nga si Mila Punzalan hilabi na pagtaas sa ihap sa mga nangapil. Mao na kini ang ikaduhang pagpahigayon sa Bibliyampo Congress sukad 2015. (@dcherald | CAV | Photos by Rene Fernandez)