Selebrasyon sa Dominggo sa Pentekostes: Batan-ong karismatic gidasig nga magpadayon

“Ang inyong mga kasingkasing mao ang akong bahandi, mao na nga grabe ang kalipay bisan sa kakapoy.”

Mao kini ang giluwatang pahayag sa Archdiocesan Service Committee – Catholic Charismatic Renewal of Davao Coordinator nga si Abraham “Abe” Dominggo sa iyang pulong pagpasalamat sa tanang nanambong hilabi na sa mga batan-ong mitambong sa Pentecost Sunday celebration sa HCDC auditorium niadtong Hunyo 4. Ang mga partisipante gikan sa 18 ka parish charismatic communities ug 18 transparochial communities.

Iya pung gidasig ang mga hamtong nga ipadayon ang pagdani sa mga batan-ong karismatic, tungod, sumala pa, sila man ang magpadayon sa misyon.

Subay sa tema, “Holy Spirit, Source of Life and Power Edifying Communion and Participation of Communities in the Mission of the Church,” ang programa sa tibuok adlaw gilangkuban sa misa nga gipangulohan ni Abp. Romulo G. Valles, arsobispo sa Dabaw, lecture sa giimbitang mamumulong nga si Sr. Violeta Navarro, ug ang praise ang worship band competition sa hapon.

Nalipay si Arsobispo Valles sa presensya sa daghang batan-on nga miapil sa kasaulogan. Iya pung gipasalamatan ang mga hamtong nga nagdala kanila. Sila gidasig nga hatagan ug daghan pang oportunidad ang mga batan-on nga magserbisyo sa Simbahan. “Mga tigulang, give way to the youth,” sumala pa ni Valles.

Dugang niya, dakung selebrasyon ang Pentekostes kay mao kini ang mikumpleto sa rebelasyon sa misyon ni Kristo sa kalibutan. Gani, sa pagsaka ni Kristo sa langit, iyang gipakunsad ang iyang Balaang Espiritu Santo.

Sa samang adlaw, gihandum sab ang ika-50 ka tuig nga pagkahimugso sa kalihukan sa karismatic sa tibuok kalibutan. Sa Dabaw, nagsugod kini pinaagi sa pagdawat ni Msgr. Paul Lo sa Sacred Heart of Jesus Parish, Obrero niadtong Oktobre 1976. Gikan sa mga titulong, Catholic Charismatic Renewal Movement of Davao (CCRMD) ug Archdiocesan Catholic Charismatic Renewal Movement of Davao (ACCRMD), gibag-o kini unom ka tuig na ang milabay. Ang kasamtangang pangalan niini mao, Archdiocesan Service Committee – Catholic Charismatic Renewal of Davao (ASC-CCRD). Si Msgr. Paul Cuison ang Spiritual Director karon.

Archdiocesan Charismatic Youth Congress

Aron mamahimong konkreto ang hagit sa Obispo ug mga buhat sa kalooy, pagahimoon karong Hunyo 10-12 ang 1st Archdiocesan Charismatic Youth Congress didto sa Christ the King Formation Center, Bago Aplaya, Davao City.

Sumala pa ni Sis. Charice G. Ferraren, ASC-CCRD youth servant, gipakusgan pag usab ang nagkaluyang hut on sa mga batan-ong karismatic niadtong Mayo 20-22, 2016. Gisundan kini ug Archdiocesan Generation Revival Youth Conference niadtong Agosto, Nobyembre sa susamang tuig ug Pebrero 2017.

Tumong sa Youth Congress nga “dad-on ang mga batan-ong hilabi na ang mga wala na sa kalihukan sa simbahan duol balik kang Kristo,” sumala pa sa sulat nga ilang gitagtag sa tanang coordinators ug head servants.

Ang registration fee sa maong panagtapok, P200. Pahinumdum sa mga delegado nga magdala ug paniudto sa unang adlaw, mag andam ug presentasyon, ug iandam ang ispiritwal nga bahin sa kaugalingon sama sa pagpangumpisal una muabot sa venue. Alang sa dugang kasayuran mamahimong ikontak ang youth servant sa mobile number: 0910-8897818, 0923-612-3724.

Save