‘Bakasyonista’ kids nakadawat ug school supplies

Nagmalampusong gi apud apuran sa school supplies ang 101 ka mga anak sa mga inmate sa Maa City Jail niining syudad sa Davao sa panagtambayayong sa Indigent Children’s Education Assistance (ICEA Inc.), Archdiocesan Commission on Prison Welfare (ACPW) ug BJMP Inmate Welfare and Development.

Nasayran nga ang ICEA nagahimo ug fund raising activity arun mahatagan ang kabataan ug suporta arun makapadayun sa paghuman sa ilang panganduy ilabina ang mga anak sa mga inmate.

Sumala sa inmate nga si Alias Josie, nag atubang sa kasong paglapas sa RA 9165 kon comprehensive dangerous drugs act of 2002, nga dako ang iyang pagpasalamat sa maong mga pundok tungud ilang gipabati ang adunay mga taong andam mubuka sa ilang mga kamot alang sa pagtabang, ug adunay dakong kasingkasing nga migakos kanila bisan pa man sa ilang kahimtang.

Dako sab ang iyang pagpasalamat nga sumala pa geswerte gihapon siya bisan napulo na siya ka tuig sa bilanguan tungud gisuportahan sa maong mga pundok ang iyang anak nga ginganlag Jane nga anaa na sa grade 12 kinsa nagtinarung sab sa pagtungha.

Gikabutyag ni Mrs Conchita Suarez, founder sa ICEA nga gipundar niya kini arun makatabang sa mga kabus, diin sumala pa nga daw sa kumutun ang iyang dughan kung makakita siya sa kabataan nga nanginahanglan sa pagtabang hinungdan nga mibuhat na siya ug aksyun.

Nanghinaot sab siya nga daghan pa ang musalmot sa pagtabang sa mga kabos.

Samtang gikabutyag ni JO1 Jello Blanco, BJMP Inmate Welfare and Development officer nga dako ang iyang pagpasalamat nga aduna siyay katambayayong nga pundok ilabina ang ICEA ug ACPW nga nagahatag ug ayuda sa anak sa mga inmate. Iya sab nga giklaro sa katawhan nga ang mga inmate dili angay kahadlokan, ug gipanigurong ang mga mubisita dili binuangan sa mga inmate.

Namahayag sab ang mga inmate nga bisan gikalimtan na sila sa ilang pamilya ug higala, naningkamut gihapon sila nga mubarug sa matag adlaw, samtang dugang sa mga inmate nga bisan anaa sila sa bilangguan daw sama gihapon silag gawasnun, tungud ila nang gibayran ang ilang nahimong kasaypanan, kaysa anaa sila sa gawasnong kalibutan apan nakulong sa konsensya.